Badina be Dahaka Dika Ita Gwauatao Heheni?

CANADA ena The Toronto Star ia gwau, “Saiens taudia be tahua gaukarana ta idia karaia neganai, ia hahedinaraia dika gwauatao karana ese lalona ena mamina ia goada dalana​​—⁠bona, sedira tauanina ia goada dalana​​—⁠ia hanamoa diba.” To, Profesa Cark Thoresen, Stanford University, U.S.A. amo, ese Stanford Forgiveness Project ena tahua gaukarana ia gunalaia, ia gwau “taunimanima haida sibona idia lalo-parara, dika gwauatao karana be dahaka bona edena bamona ia gaukara diba.”

Dika gwauatao momokani karana be kara badana ta Keristani dalana ai. The Toronto Star ese ena anina be inai bamona ia gwauraia, “oi lalo-parara ta be oi dekenai ia kerere, to badu ena badina ibounai oi rakatania, bona gabeai oi dekenai ia kerere tauna oi kara henia mai hebogahisi bona lalokau ida danu.” Ia be kerere ia gwauraia lasi ia maoro, ekskius ia karaia lasi, ia laloaboio lasi, o kerere ia gwauraia lasi ia be kerere lasi; danu, anina lasi kerere tauna be oi ia hadikaia lou dalana dekenai oi giroa. Unai ripoti ia gwau dika gwauatao momokani dalana be “badu bona lalohadai dikana oi rakatania.”

Tahua gaukarana idia karaia taudia idia gwau, dika gwauatao karana ese tauanina dalanai namo havaraia dalana idia tahua noho be namo. To, idia gwau lalona ia hanamoa diba, “hisihisi, lalo-hekwarahi bona lalo-metau ia hamaragia” danu.

Dika gwauatao ena badina namona be Efeso 4:32 lalonai ia hahedinaraia, ia gwau: “Umui ibounai ta ta do umui durua, bona ibounai ta ta do umui bogahisihisi henia. Bona ibounai ta ta edia kara dika do umui gwauatao, Dirava ese Keriso dainai emui dika ia gwauatao hegeregerena.” Bema dika ita gwauatao neganai, bona ma kara haida dekenai danu, ita ia hagoadaia Dirava ena kara bamona ita karaia.​​—⁠Efeso 5:⁠1.

Bema badina namona ia noho ma ta dekenai hebogahisi ita hahedinaraia bona ena kerere ita gwauatao diba, to unai kara ita dadaraia, iseda hetura karana Dirava ida ia hadikaia diba. Iehova ia ura ta ta ita gwauatao heheni. Bena ita guriguri diba ia ese iseda kerere do ia gwauatao totona.​—⁠Mataio 6:​14; Mareko 11:25; 1 Ioane 4:​11.