Bouti Taria Tauna amo Ita Abia Dibana

DAVARA dekenai tau tamona sibona bouti amo ia loaloa be mai ena hekwarahi bada. Bouti taria tauna ena tauanina ia hesiku neganai, bouti be dika gabuna ia lao diba, bena kerere ia vara bona dala kereredia ia abia hidi. Unai dainai, bouti taria tauna be dogo ena namo ia laloa bada. Unai dogo dainai bouti taria tauna do ia laga-ani diba, bona dika gabuna dekenai ia hure lao henia lasi. Ma danu, unai dogo be bouti ena vairana kahana ia dogoatao dainai bouti ena vairana be lai bona hurehure ia vaira henia, unai amo bouti be ia helai namonamo.

Davara dekenai bouti taria taudia ese hekwakwanai idauidau idia davaria bamona, Keristani taudia be inai tanobada ena metau idauidau idia davaria, bona idia laloa idia laga-ani be namo. Nega ta, Iesu be ena hahediba taudia dekenai ia gwau: “Umui mai, taunimanima noho lasi gabuna dekenai ita lao, ita laga-ani sisina.” (Mareko 6:​31) Hari inai negai, Keristani taudia haida be pura haida idia abia hidi idia loaloa totona eiava Saturday bona Sunday ai, edia ruma bese taudia ida idia lao gabu ta, idia laga-ani totona. Unai amo mamina namona bona goada idia abia diba. To, unai bamona negadia ai, edena bamona ita diba ita be lauma dalana dekenai dika do ita davaria lasi? Ita hure lao lasi bona ita noho namonamo totona, lauma dalanai iseda dogo be dahaka?

Iehova be ita dekenai mai ena ura bada ida harihari gauna ta ia henia. Unai harihari gauna be iena Hereva Helagana, Baibel. Bema dina ta ta iboudiai lalodiai ita duahia, Iehova kahirakahira dekenai do ita noho bona ia do ita rakatania lasi. Iena sisiba herevadia ese ita ia hagoadaia bona durua diba bena Satani bona iena tanobada edia hedibagani karadia do ita dadaraia diba. Baibel duahia karana ita badinaia hanaihanai, nega sisina lalonai iseda sediual ia idau negadia ai danu, ese lauma dalanai ita do ia dogoatao auka.​​—⁠Iosua 1:​7, 8; Kolose 2:⁠7.

Salamo torea tauna ese ita ia hamaoroa lou, ia gwau do “idia moale momokani” taudia be “Lohiabada ena Taravatu dekenai idia moale, bona Lohiabada ena Taravatu idia laloa, dina bona hanuaboi ibounai lalonai.” (Salamo 1:​1, 2) Dina iboudiai Dirava ena Hereva ita duahia loulou amo “moale” ita davaria, badina ita dekenai mamina namona ia havaraia bona ita ia hagoadaia, bena ita hegaegae diba Keristani karadia ita karaia noho totona.