Tanobada Ena Maino Edena Bamona?

TANOBADA ena maino be kahirakahira do ia mai, a? Taunimanima momo be nega ta unai idia laloa to hari be idia daradara. South Africa edia Daily Mail & Guardian niuspepa ena ripoti ta lalonai iseda vaira negana ena hekwakwanai ia herevalaia, ia gwau: “toana be, lagani 10 gunanai idia gwauraia tanobada ibounai ena nega matamatana be hari anina do ia vara lasi.”

Toretore taudia ese lagani 10 gunanai ia vara lalohadai namona idia herevalaia lou. Tanobada besedia edia inai heheni karana ia ore, bona tano goadadia be siahu totona edia hepapahuahu idia ore. Toana be unai nega matamatana do ia hedinarai ena nega ai, momo idia laloa taunimanima ese ogogami, gorere, bona tanobada hamiroa karadia idia hanamoa daladia badadia idia tahua matamaia be namo. Unai ripoti ia gwau: “Idia herevalaia gaudia be hari lalohadai kava sibona. Hekwakwanai matamatadia be guna ita diba lasi gabudia dekenai idia vara; tanobada ena ogogami be ia bada daekau noho. Niuklia kohudia idia karaia tanodia matamatadia be rua. UN ena ladana be ia dika badina taunimanima ese idia davaria hekwakwanaidia hanamoa totona idia hegeregere lasi. Guna taunimanima idia laloa noho namona do ia vara, to hari unai ia idau bona idia laloa gari maurina do ia vara.”

Baibel tahua taudia idia lalo-parara, herevana taunimanima idia hekwarahi bada, to do idia kwalimu momokani diba lasi. Dahaka dainai do ia vara lasi? Badina, Baibel ese ia hahedinaraia bamona, “Satani ese tanobada taudia ibounai ia gunalaia noho.” (1  Ioane 5: ​19) Satani ena lohia henunai, tanobada be Dirava ese ia havaraia ena badina hegeregerena Paradaiso ai do ia lao diba lasi.

To danu, nega namona ena helaro ena badina ia noho. Iehova Dirava be ia gwauhamata tanobada dekenai maino do ia havaraia, bona inai nega ena oromana ena kahana ta ta ia hanamoa karana amo lasi; to “tanobada matamata” ia mailaia karana amo, bona unuseniai be “kara maoromaoro do ia noho.” (2 Petero 3: ​13) Oibe, Dirava ena Basileia amo, tanobada ibounai be maino bona moale gabunai ai do ia lao, bona unuseniai kamonai taudia be edia mauri bona edia gaukara do idia moalelaia hanaihanai. Danu, Dirava be ia gwauhamata “ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani.” Inai gwauhamata be taunimanima edia lalohadai amo idia mai lasi. To, inai be Havaraia Tauna ena gwauhamata Herevana amo ia mai, bona Ia koikoi diba lasi.​​—⁠Apokalupo 21:4; Tito 1:⁠2.