“Iehova Ena Kara be Namo Herea Lau Dekenai!”
MARCH 1985 ena adorahi namo hereana ta lalonai, New York ai, U.S.A. dekenai, ia noho Iehova ena Witnes taudia edia hedikwota ena Toretore Dipatmen dekenai idia gaukara tatau bona hahine ese gau namona ta idia moalelaia. Unai negai Karl F. Klein be lagani 60 lalonai ful-taim hesiai gaukara ia karaia vadaeni. Mai ura bada ida, Tadikaka Klein ia gwau: “Iehova ena kara be namo herea lau dekenai!” Ia gwau Salamo 37:4 be ia ura henia Baibel sirina ta. Gabeai, ena cello ia gadaralaia amo ibounai ia hamoalea.
Lagani 15 gabedia ai, Tadikaka Klein be toretore gaukarana ia karaia noho bona Iehova ena Witnes taudia edia Hakaua Oreana ena gaukara ia karaia danu. Bena, January 3, 2001 ai, Karl Klein ena mauri lagani be 95 neganai, mai abidadama ida ena tanobada maurina ia haorea.
Karl be Germany dekenai ia vara. Iena ruma bese be United States dekenai idia lao, bona Karl be Chicago ena kahana ta ai, Illinois dekenai, ia tubu daekau. Idia do matamata neganai, Karl bona ena tadina Ted be Baibel idia ura henia bada. Karl be lagani 1918 ai ia bapatiso, bona lagani 1922 ai, Bible Student taudia edia hebouhebou ta dekenai ia kamonai gau namodia ese ena lalona idia veria momokani, bena ena mauri ibounai lalonai haroro gaukara ia ura henia bada. Ia ura bada wiki iboudiai lalonai haroro gaukara ia karaia, ena mauri ena wiki ginigabedia lalonai danu ia do haroro noho.
Karl be lagani 1925 ai hedikwota dekenai ia gaukara tauna ta ai ia lao, ia ese printa gaukara ia karaia guna. Ia be miusiki ia ura henia momokani, bona lagani haida lalonai Keristani reidio program ai miusiki idia gadaralaia taudia ida cello ia gadaralaia. Unai murinai, Haroro Naria Dipatmen dekenai ia gaukara, bona dipatmen naria tauna T. J. Sullivan ena hebamo ia moalelaia bada. Unai nega lalonai, Ted ia headava bona ena hahine Doris ida Puerto Rico dekenai misinari gaukara idia karaia.
Karl be Toretore Dipatmen dekenai lagani 50 bamona ia gaukara, bona gaukara namona ia karaia badina tahua karana ia ura henia bada bona Baibel ia diba namonamo. Lagani 1963 ai, Karl be Margareta, Bolivia dekenai hesiai gaukara ia karaia Germany misinari taihuna ta ia adavaia. Margareta ena lalokau heduruna ese Karl ia durua bada ia gorere negana lalonai, unai dainai gaukara namona ia karaia noho ena be momo be gaukara amo idia ritaea mauri laganina ia hanaia vadaeni. Karl be mai momokani ida ia hereva bona miusiki idia ura henia bada taudia idia hahedinaraia ura badana dainai, hebouhebou badadia bona kongregesen heboudia dekenai momo ese idia laloatao hereva namodia ia henia. Iena mase ia kahirakahira neganai, New York Betele famili badana edia daba siri idia herevalaia lalonai unai kara ia gunalaia bona iboudiai ese unai idia moalelaia bona ia amo namo idia abia.
Gima Kohorona idia duahia taudia momo be Tadikaka Klein ena mauri sivaraina idia laloatao namonamo diba, unai be June 1, 1985 ena magasin lalonai idia halasia bona ia ese lalona veria dalanai ena mauri lalonai idia vara gaudia ia hahedinaraia. Unai sivarai oi duahia eiava oi duahia lou neganai do oi moale, oi laloa danu, unai toretore tauna be ma lagani 10 mai kahana lalonai abidadama goada Keristani tauna ta ena gaukara ia karaia noho.
Tadikaka Klein be Lohiabada ena horoa tauna ta dainai, ena kudouna ibounai ida ia ura bada Keriso ida guba dekenai ia lohia. Badina momo dainai ita abia dae diba Iehova ese ena ura ia hagugurua vadaeni.—Luka 22:28-30.
[Picture on page 31]
Karl lagani 1934 ai, T. J. Sullivan bona Ted bona Doris ida
[Picture on page 31]
Karl bona Margareta, October 2000 ai