Golo Namona Ena Goada Ia Hereaia
GOLO be momo ese idia tahua goadagoada gauna, badina ia be mai ena hairai bona ia noho daudau diba. Idia ura henia ena badina badana be ena diaridiari be do ia ore lasi bona toana be do ia noho ela bona hanaihanai. Unai ena badina be golo be ranu, oksijen, salifa, bona kahirakahira gau ma haida ese idia hadikaia diba lasi. Lagani handred momo gunanai idia mutu bouti lalodiai bona gabu ma haida dekenai golo koroa gaudia idia davaria neganai, momo idia do diaridiari noho.
To, hoa gauna be Baibel ia gwau ma gau ta ia noho daudau danu, bona iena goada ese ‘lahi lalonai ena goada idia tohoa bona hanamoa golo’ ena goada ia hereaia. (1 Petero 1:7) Lahi bona gau ma haida amo golo idia “hanamoa” neganai, miro gaudia 99.9 pesen idia kokia diba. To, aqua regia (royal water), ena kahana hani amo kahana toi be hydrochloric acid bona kahana ta be nitric acid, lalonai idia hanamoa golo danu ia dika ia lao, eiava ia ore bamona. Unai dainai, saiens dalanai Baibel ena hereva be maoro, badina ia gwau ‘golo ia dika ia lao.’
To, Keristani abidadama korikorina dainai “mauri do ita abia.” (Heberu 10:39) Taunimanima ese abidadama goada tauna idia hamasea diba, Iesu Keriso idia hamasea bamona. To abidadama korikorina idia abia taudia ese inai gwauhamata idia abia: “Lau do umui badinaia noho ela bona mase, vadaeni lau ese umui emui kwalimu ahuna, mauri, umui dekenai do lau henia.” (Apokalupo 2:10) Mai abidadama ida idia mase taudia be Dirava ese do ia laloatao noho, bona idia do ia hatoreaisi lou. (Ioane 5:28, 29) Herevana golo ena bada be edena bamona, to unai ia karaia diba lasi. Unai dala ai, abidadama ena namo ese golo ena namo ia hereaia. To, abidadama ena namo be unai bamona totona, idia hanamoa, eiava idia tohoa be namo. Momokani, Petero ia gwau ‘idia tohoa abidadama’ ena namo ese golo ena namo ia hereaia. Iehova ena Witnes taudia be mai edia moale ida Baibel stadi karana lalonai oi do idia durua, Dirava momokanina, Iehova, bona ena Natuna, Iesu Keriso, dekenai abidadama goadana oi abia bona oi dogoatao totona. Iesu ia gwau, unai ena anina be “mauri hanaihanai.”—Ioane 17:3.