Au Idia Hadikaia Gaudia

BAIBEL negadiai, taunimanima idia laloa au be dava bada gaudia. Hegeregere, Aberahamo ese ena lalokau hahine, Sara, ia guria totona gabu ia hoia neganai, idia torea kontraka pepana ai au idia gwauraia danu.​—⁠Genese 23:​15-18.

Hari danu, taunimanima idia laloa au be dava bada gaudia, bona tanobada hegegemadai au momo gabudia naria karana idia laloa bada. Buka ladana State of the World 1998 ia gwau: “Ena be not tanodia ai taunimanima momo ese siahu tanodia edia au momo gabudia dainai idia laloa momo, to reana idia diba lasi siahu lasi gabudia dekenai, sibona edia tanodia ai, au momo gabudia be kahana kahana ai sibona bona gau haida ese idia hadikaia noho, au momo gabudia idauidau ma haida be unai bamona lasi.” Dahaka gaudia ese unai not tanodia, Europe bona North America dekenai, edia au momo gabudia idia hadikaia noho? Taunimanima momo ese au momo utua karana idia herevalaia, to gau ma haida ese au idia hadikaia noho, toana be au ta ta mai ena nega ena nega ai idia hadikaia. Unai gaudia be dahaka? Hodahoda hadikaia karana bona medu lalonai ia noho muramura dikana. Unai hadikaia gaudia dainai metairametaira au idia manoka idia lao, bona idia goada lasi dainai gaigai maragidia bona gorere ese idia hadikaia diba.

Lagani momo lalonai, tanobada ena ranu bona hodahoda idia naria taudia bona unai kara idia laloa bada taudia ma haida ese idia hahedinaraia, tanobada ena ranu bona hodahoda ita gimaia be gau badana. Lagani 1980 murinai, Germany dekenai saiens taudia ese hodahoda hadikaia karana bona medu lalonai ia noho muramura dikana idia havaraia dika idia stadilaia murinai, idia gwau: ‘Bema gau ta ita karaia lasi, lagani 2000 bamona ai, taunimanima ese laulau bona muvini piksa sibona lalonai au momo gabudia idia moalelaia diba.’ To ita moale diba, badina tanobada ena sibona hamatamataia siahuna ia bada dainai, idia gwauraia dika ibounai idia do vara lasi.

To, Dirava sibona ese nega daudau lalonai tanobada ena ranu bona hodahoda ia gimaia diba. ‘Ia ese medu ia siaia diho, ororo edia latanai ia moru,’ bona ‘ia ese rei ia hatubua, boromakau do idia ania totona. Ia dainai, ita taunimanima ese aniani avadia idauidau ita hadoa diba, iseda aniani totona.’ Bona ia gwauhamata ‘tanobada idia hadikaia taudia do ia alaia ore.’ (Salamo 104:​13, 14; Apokalupo 11:18) Vaira negana be do ia namo herea, badina tanobada idia noholaia taudia be gau ta ese ia hadikaia lasi tanobadana do idia moalelaia diba ela bona hanaihanai!​—⁠Salamo 37:​9-11.