“Oiemu Diari Dainai Ai ese Diari Ai Itaia”

DIARI be nega momo ita laloa bada lasi gauna, ela bona paua ia gaukara lasi bona iseda noho gabuna be ia dibura neganai, diari ita laloa bada. Ita moale diba, iseda guba ena “paua steiseni”​—⁠dina​—⁠be hanaihanai diari ia henia. Bona dina ena diari dainai, ita itaia, aniani, hahodi, bona mauri noho diba.

Ita mauri totona diari be mai anina bada dainai, Genese dekenai Dirava ese gau ibounai ia havaraia dinana ginigunana ai diari ia havaraia guna ita duahia neganai ita hoa lasi. “Dirava ia gwau, ‘Diari ia vara namo.’ Vadaeni, diari be ia vara.” (Genese 1:⁠3) Dirava idia gari henia tatau hegeregere King Davida bamona, be hanaihanai idia diba Iehova be mauri bona diari ena badina. Davida ia gwau: “Badina oi be mauri ibounai ena badina, bona oiemu diari dainai, ai ese diari ai itaia noho.”​—⁠Salamo 36:⁠9.

Davida ena hereva be mai anina dala korikorina ai bona laulau dalanai. Encyclopædia Britannica ia gwau: “Momokani, diari dainai ita itaia diba.” Ma ia gwau: “Matana amo hereva momo be idia lao harana dekenai, to tauanina ena kahana ma haida be unai bamona lasi.” Badina ita dibaia gaudia momo be matana amo dainai​—⁠ia gaukara namonamo totona diari ia abia be namo​—⁠diari be Baibel lalonai laulau dalanai idia gaukaralaia danu.

Unai dainai, Iesu ese ena hahediba taudia ia hamaoroa: “Lau be tanobada ena diari. Lauegu murina dekenai do ia raka tauna be dibura lalonai do ia loaloa lasi, to mauri ena diari do ia abia.” (Ioane 8:12) Iesu ese ia herevalaia diari laulau dalanai be ia harorolaia hereva momokanina, unai ese ena hereva idia kamonai taudia edia lalona bona kudouna ia hadiaria diba. Iesu ena hahediba taudia be lagani momo lauma diburana dekenai idia noho murinai, hari Dirava ena ura taunimanima totona bona Basileia ena helarona idia lalo-pararalaia diba. Unai be “mauri ena diari” momokani, badina unai diba ese mauri hanaihanai dekenai ia hakaua lao diba. Iesu ese ena guba Tamana ia guriguri henia ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:⁠3) Namo lasi unai lauma diarina ita laloa maragi!