Dirava ese Ita Ia Laloa, Eiava?

RUMA bese ena hekwakwanai, gorere, moni gaukara, eiava maduna metaudia ma haida dainai oi lalo-metau bada, a? Taunimanima momo be unai idia mamia. Bona hari inai negai taunimanima momo ese kara gageva, taravatu utua karadia bona dagedage karadia idia davaria, ani? Momokani, unai be Baibel ena hereva hegeregerena: “Dirava ese ia karadia gaudia ibounai be idia hisihisi noho, bona idia tai noho, . . . guna ia mai bona harihari.” (Roma 8:​22) Unai dainai, taunimanima momo idia henanadai: ‘Dirava ese ita ia laloa, eiava? Ia ese ita do ia durua, a?’

Aonega King Solomona be Dirava ia guriguri henia lalonai ia gwau: “Oi sibona ese taunimanima edia laloa oi diba.” Solomona ia diba momokani Dirava be ita ia diba sibona lasi to ita ta ta ia laloa danu. Ia ese Dirava ia noia ‘guba dekena amo edia guriguri do ia kamonai’ bona ia idia gari henia bona ia dekenai edia “lalohisihisi” idia gwauraia taudia edia guriguri ia haere henia totona.​​—⁠2 Sivarai 6:​29, 30.

Hari, Iehova Dirava be ita ia laloa noho bona ita ia boiria ia do ita hereva henia guriguri amo. (Salamo 50:15) Ia gwauhamata, mai kudouna ibounai ida ia idia noinoi henia bona iena ura hegeregerena idia noinoi taudia edia guriguri do ia haerelaidia. (Salamo 55:​16, 22; Luka 11:​5-​13; 2 Korinto 4:⁠7) Oibe, Iehova ese iena bese taudia ibounai ‘edia guriguri ia kamonai’ henia. Unai dainai, bema Dirava ita abidadama henia, guriguri amo iena heduru ita noia, bona ia kahirakahira ita lao, iena henari mai lalokauna bona hakaua dalana do ita mamia momokani. (Aonega Herevadia 3:​5, 6) Baibel torea tauna Iamesi ese ita ia hagoadaia, ia gwau: “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.”​​—⁠Iamesi 4:⁠8.