Mauri Daudauna Moalelaia Dalana

TAUNIMANIMA haida idia gwau, momo idia ura idia mauri noho; to idia ura lasi idia buruka. Moni gaukara amo idia doko gwauraia taudia be sibona edia ura gaudia karaia totona nega bada do ia noho bona maduna be momo lasi negana idia naria noho. To, edia mauri be badina lasi bona anina lasi gauna ai ia lao garina idia gari. Sibona noho karana, lalohisihisi bona edia goada ia ore ia lao karana idia garilaia danu.

Vadaeni, oi moalelaia diba mauri dalana be dahaka? Tura namodia bona lalokau ruma bese taudia ese heduru idia henia matamata bona buruka taudia idia hamoalea totona. Taunimanima haida ese buruka tauna idia durua karana be gau badana lasi. To mai anina bada gauna be edena bamona buruka tauna ta ese ma haida ia durua diba.

Nega daudau lalonai headava buruka taudia 423 dekenai idia karaia tahua karana ta ese ia hahedinaraia “taunimanima ma haida durua karana ese iseda mauri ia halataia diba.” Stephanie Brown, unai tahua karana ia hakaua hahinena, ia gwau: “Unai tahua karana ese ia hahedinaraia hetura karana amo ita abia gauna ese namo ia mailaia lasi; to henia karana ese namo bada ia havaraia.” Reana unai bamona henia karana be ma haida edia ruma gaukara ita karaia, edia natudia ita naria, idia totona sitoa dekenai ita lao, motuka amo idia ita abia loaloa, eiava ta ia ura ia herevalaia gaudia ita hakala henia, unai amo ma haida ita durua noho.

Lagani 2,000 bamona gunanai, Iesu Keriso ia gwau: “Henia kara ena moale be bada, abia kara ena moale be maragi.” (Kara 20:35) Mauri daudauna moalelaia dalana be banika akaun dekenai moni momo idia noho eiava buruka haraga lasi totona durua gaudia haida oi abia bona aniani haida ania karadia amo ia mai lasi. To, ia be gaukara goada noho bona ta be ena nega bona goada ia henia idia dabu taudia ia durudia totona.

To, henia karana sibona ese buruka, gorere, bona mase amo ita do ia hamauria lasi. Dirava ena Basileia sibona ese unai bamona gaudia do ia haorea momokani. Iena lohia henunai, gorere bona “mase . . . be do idia ore momokani.” (Apokalupo 21:​3, 4; Isaia 33:24) Momokani, kamonai taudia be mai moale ida tanobada paradaisona dekenai do idia noho ela bona hanaihanai. (Luka 23:43) Iehova ena Witnes taudia idia moale badina Baibel amo mauri daudauna moalelaia dalana be ma haida dekenai idia henia diba.