Noho Namo Momokani Do Ita Moalelaia Diba, A?

NATUDIA be edia lalokau tama sina ida idia gadara hebou​—⁠taunimanima momo be unai idia itaia neganai idia moale, ani? Unai natudia be edia tama sina ida idia noho dainai, idia mamia dika ta do idia davaria lasi. To, matamata taudia momo be unai bamona nega namodia idia moalelaia lasi. Natudia haida be dina iboudiai idia laloa momo, hanuaboi ia mai neganai edeseniai do idia mahuta. Ruma lasi natudia bona edia noho dalana ia dika taudia ma haida totona helaro ia noho, a?

Ena be vaira negana ia dika, to Dirava ena Hereva ese helaro ia henia. Peroveta tauna Isaia ia gwau nega ta do ia mai taunimanima ibounai be do idia noho namo momokani. Ia gwau: “Idia ese edia ruma do idia haginia, bona unai ruma lalonai do idia noho. Idau taudia ese edia ruma do idia abia lasi. Bona idia ese vain umadia do idia hadoa, vadaeni vain ena anina, uaina do idia inua. Idau taudia ese edia uaina do idia inua lasi.”​—⁠Isaia 65:​21, 22.

To unai helaro be mai ena badina korikorina, a? Momokani, inai hereva “helaro,” ese ia hahedinaraia lasi gau ta be hanaihanai do ia vara momokani. Hegeregere, Brazil ai, idia gaukaralaia herevana ta be inai, “Helaro be do ia mase gauna ginigabena,” anina be taunimanima momo be edia helaro idia do dogoatao noho ena be unai helaro be mai ena badina korikorina lasi. To, mauri Diravana ese ita dekenai ia henia helarona be idau. Aposetolo Paulo ia gwau: “[Dirava] dekenai idia abidadama henia taudia ibounai be hemarai do idia davaria [“be do idia lalohisihisi,” NW ] lasi.” (Roma 10:11) Idia guguru vadaeni Baibel ena peroveta herevadia dainai, ita diba momokani Iehova Dirava ese ia karaia gwauhamata ibounai danu be do idia vara momokani. Unai gwauhamata idia momokani neganai, mauri dikana dainai natudia be dala dekenai idia noho karana be do ia ore momokani.

Hari danu, Baibel lalonai idia noho sisiba namodia ese helaro lasi taudia ia durua diba edia mauri idia hanamoa bona noho namona momokani idia davaria totona. Unai be edena bamona do ia vara? Oiemu gabu ai idia noho Iehova ena Witnes taudia ese mai moale ida oi idia durua diba unai henanadai ena haere oi davaria totona.