Iseda Mauri Dinadia Ita Duahia Dalana

“MANI ai dekenai oi hahedinaraia edena bamona emai mauri dinadia do ai duahia, bena unai amo kudouna mai ena aonega do ai abia.” (Salamo 90:12, NW) Unai be Baibel torea tauna, Mose, ena manau gurigurina. Dahaka totona ia guriguri? Ita danu be unai bamona ita guriguri diba, a?

Siri 10 dekenai Mose ese taunimanima edia mauri be ia kwadogi ia herevalaia. Nega ma ta ai, Iobu ena hereva ia gwauraia: “Ita ibounai, hahine edia bogana, dekena amo ita vara taudia, iseda mauri dinadia be momo lasi, bona iseda hekwarahi be bada herea.” (Iobu 14:1) Ia hedinarai taunimanima edia goevadae lasi maurina ia kwadogi dainai Mose ia lalohisihisi. Unai dainai, dina ta ta be harihari gauna bamona ia laloa bada. Mose ena guriguri lalonai Dirava dekenai ia hahedinaraia ia ura ena mauri be aonega dalanai do ia gaukaralaia ena Havaraia Tauna ia hamoalea totona. Ita danu ita ura iseda mauri be aonega dalanai ita gaukaralaia, a? Namona be ita hekwarahi unai ita karaia totona, bema ita ura hari Dirava ena lalonamo ita abia.

Badina ma ta dainai Mose bona Iobu be unai bamona idia laloa, unai ese iseda lalona ia hagoadaia danu. Dirava idia badinaia tatau ruaosi ese nega vaira ena ahuna namona idia laloa bada​—mauri namona tanobada latanai. (Iobu 14:14, 15; Heberu 11:26) Unai nega ai mase ese ta ena gaukara namona do ia hadokoa lasi. Iseda Havaraia Tauna ia ura abidadama taudia be tanobada paradaisona dekenai do idia mauri hanaihanai. (Isaia 65:21-​24; Apokalupo 21:​3, 4) Unai ia vara diba oi dekenai, bema emu mauri dinadia be aonega dalanai oi duahia bena kudouna mai ena aonega do oi abia.