Good News for People of All Nations

UNAI be lagani 2004/05 ai, Iehova ena Witnes taudia edia “Dirava ida Ita Raka” Distrik Hebouheboudia dekenai idia halasia buklet ta ena ladana. Unai rau 96 buklet lalonai ia noho sivaraina be gado idauidau 92​—⁠Africa ia lao Zulu gado​—⁠ai idia hahanaia, bona unai buklet ese ita do ia durua Basileia ena sivarai namona be taunimanima ibounai dekenai ita halasia totona. (Mataio 24:14) Tadikaka bona taihu haida ese unai buklet idia gaukaralaia neganai idia davaria ekspiriens be henunai idia noho.

• Witnes ruma bese ta be hebouhebou dekenai unai buklet idia abia murinai, idia be loaloa gabudia toi dekenai idia lao. Unuseniai India, Netherlands, Pakistan, bona Philippines taudia idia davaria. Tau ia gwau: “Ena be unai taudia be nao gado sisina idia diba, to buklet lalonai ia noho sivarai be edia gado dekenai ai hahedinaraia neganai, idia hoa badina edia hanua amo idia be gabu daudau dekenai idia noho. Tanobada hegegemadai ita karaia gaukarana bona iseda lalotamona karana idia itaia goevagoeva.”

• Witnes taihuna ese inai buklet be ena gaukara turana ta, India tauna, dekenai ia hahedinaraia. Unai tauna be buklet lalonai gado idauidau ia itaia bona unai sivarai be ena gado dekenai ia duahia neganai, ia moale bada. Unai ese ena lalona ia veria Baibel amo gau ma haida idia herevalaia totona. Unai taihu ena gaukara turana ma ta Philippines hahine, be unai buklet lalonai ena gado ia itaia neganai, ia hoa bada bona ia ura Iehova ena Witnes taudia ia dibaia.

• Canada dekenai, Nepal hahine ta ia ura Witnes taihuna ida telefon amo Baibel ia stadilaia, to ia ura lasi ena ruma dekenai unai taihu ia boiria. To, taihu ese unai hahine dekenai buklet ia herevalaia bona ia hamaoroa buklet lalonai Nepali gado ia noho neganai, unai hahine be mai moale ida ena ruma dekenai taihu ia boiria. Ia ura bada unai sivarai be ena gado korikorina dekenai ia itaia! Unai nega amo Baibel stadi be unai hahine ena ruma dekenai idia karaia.