Oi be Lagani Auna Bamona, A?

PAPUA NEW GUINEA ai, Port Moresby ena hanua ta dekenai, tadikaka rua be edia haroro gaukara idia haorea bona ruma dekenai idia giroa lou. Idia raka noho lalonai, au hairaina ta idia itaia. Tadikaka badana ia gwau: “Aaa lagani auna!” Bena mero matamata dekenai ia giroa bona ia gwau: “Lagani auna be au ma haida bamona lasi; lagani ta ta ai ena rau idia moru, bona toana be ia mase. To, medu ia diho neganai, ia mauri lou, flaoaflaoa idia tubu lou, bona ena hairai ia hedinarai lou.”

Lagani auna​—⁠momo ese idia gwauraia royal poinciana o Christmas tree​—⁠amo gau ta ita dibaia diba. Diba bada taudia haida idia gwau, lagani auna bona ma au foa be flaoa idia atoa au mai hairaidia tanobada dekenai. Ena be medu ia diho lasi dainai edia flaoaflaoa bona rau idia ore, to unai au be ranu idia haboua namonamo. Edia ramuna be idia goada bona tano lalonai idia diho bona nadi idia gegea diba. Unai dainai, lai gubana lalonai ia gini goada. Ita gwau diba, lagani auna be gabu dikadia dekenai ia tubu namonamo diba.

Gau haida ese eda haheauka do idia tohoa. To dahaka ese ita do ia durua ita haheauka totona? Lagani auna bamona, ita ese Baibel ena mauri ranuna ita haboua bona ita inua diba. Danu, namona be iseda “nadi”​—⁠Iehova​—⁠bona ena orea ita rakatania lasi. (2 Samuela 22:​3, BHğ) Momokani, lagani auna mai hairaina ese ita ia hadibaia gauna be inai: Ena be gabu dikana dekenai ita noho, to bema Iehova ese ia henia gaudia ita gaukaralaia namonamo, ita be lauma dalanai do ita goada bona hairai diba. Unai bamona ita haheauka dainai, Iehova ese ia “gwauhamatalaia davana” namodia, mauri hanaihanai danu, do ita abia diba.​​—⁠Heberu 6:12; Apokalupo 21:⁠4.