“Ma Ta Oi Inua”

ALLEN ena mauri lagani 11 neganai alkahol inua momo karana ia matamaia.a Ia bona ena turana haida be uda dekenai idia gadara. Idia be muvi dekenai idia itaia taudia edia kara hegeregerena idia karaia, to idia inua gauna be alkahol momokanina.

Tony ena mauri lagani 40 neganai, alkahol inua momo karana ia matamaia. Matamanai be kavabu tamona o rua ia inua, to gabeai hanuaboi iboudiai kavabu faiv o siks ia inua. Gabeai nega ta ta ai, dina tamona lalonai kavabu hida ia inua be ia diba lasi.

Allen be haida edia heduru ia tahua alkahol inua momo karana ia hadokoa totona. To, Tony be ena ruma bese bona turana edia heduru ia dadaraia. Allen ia do mauri noho dainai ena sivarai ia gwauraia, to Tony be lagani haida gunanai, inuinu momo karana dainai, motuka aksiden ai ia mase.

Herevana ta sibona ia inua kekero, to ia ese ma haida edia mauri ia hadikaia o hamasea diba.b Nega momo kekero taudia be hereva mirodia idia gwauraia, haida idia botaia o hamasea, motuka o gaukara gabunai aksiden idia davaria, bona gorere haida idia davaria. Lagani ta ta ai taunimanima be kekero karana dainai moni momo idia negea, bona kekero taudia be sibona dekenai, bona edia ruma bese bona natudia dekenai lalohisihisi o dika idia havaraia.

Orea ta (U.S. National Institutes of Health) ia gwau: “Idia inuinu momo taudia haida be idia kekero momokani lasi, bona kekero taudia haida be dina haida idia inuinu lasi.” Momo be unai bamona idia karaia, to idia laloparara lasi idia be alkahol momo inua karana idia manadalaia. Ma haida be nega ibounai idia inuinu lasi, to reana dina tamona lalonai kavabu faiv mai kahana idia inua.

Bema alkahol oi inua, oi laloa kavabu hida oi inua be emu sikele ia hanaia? Edena bamona oi diba kavabu “ma ta oi inua” be namo lasi? (Aonega Herevadia 23:​29, 30, Contemporary English Version) Inai magasin be unai do idia herevalaia namonamo.

[Footnotes]