Inai Oi Diba, A?

Israela hahelaga tauna badana edia kemena dabua ai idia atoa dava bada nadidia be edeseni amo idia abia?

▪ Israela taudia be Aigupito idia rakatania bona tano gagaena dekenai idia lao neganai, Dirava ese idia ia hamaoroa kemena dabua do idia karaia. (Esodo 28:15-21) Unai kemena dabua ai inai nadi idia noho: Sadio, topasio, barekete, samaragi, sapairo, vasiga, huakinto, akate, ametuso, berulio, onuku bona iasipa.a Israela taudia ese unai dava bada nadidia be edeseni idia abia?

Baibel negadiai, taunimanima be dava bada nadidia idia laloa bada bona idia hoihoilaia danu. Hegeregere, idaunegai Aigupito taudia be daudau gabudia, hari idia gwauraia Iran, Afghanistan, bona India amo dava bada nadidia idia hoia. Aigupito ena maini gabudia ai dava bada nadi idauidau idia davaria. Aigupito lohia taudia ese idia lohiaia tanodia ai dava bada nadidia idia abia. Iobu be ena negai taunimanima ese dava bada nadidia tahua dalana ia herevalaia neganai, ia gwau idia be auri bamona gaudia idia gaukaralaia bona guri idia geia. Idia davaria nadidia haida be sapairo bona tapasio.​—Iobu 28:1-11, 19.

Esodo bukana ia gwau, Israela taudia ese Aigupito tanona idia rakatania neganai, dava bada kohudia idia abia lao danu. (Esodo 12:35, 36) Unai dainai ita gwau diba, hahelaga tauna badana ena kemena dabua dekenai idia atoa dava bada nadidia be Aigupito amo idia abia.

Baibel negadiai dahaka dainai wain be muramura bamona idia gaukaralaia?

▪ Iesu ese parabole ta ai, henaohenao taudia ese idia dadabaia tauna ia herevalaia. Iesu ia gwau Samaria tauna ta ese unai tauna ia durua, “ena bero latanai dehoro bona wain ia bubua bona ia kumia.” (Luka 10:30-34) Aposetolo Paulo ese ena turana Timoteo ia tore henia neganai, ia gwau: “Ranu sibona do oi inua lasi, to wain sisina do oi inua emu bogana hanamoa totona, badina nega momo oi gorere.” (1 Timoteo 5:23) Iesu ese ia gwauraia parabolena bona Paulo ena sisiba be medikol dalanai ia maoro, a?

Buka ta (Ancient Wine) ia gwau, wain ese “hisihisi ia hamaragia, jems ia hamasedia, bona gorere ma haida ia hanamoa diba.” Baibel negadiai, Aigupito, Mesopotamia bona Suria taudia ese wain idia gaukaralaia momo gorere hanamoa totona. Buka ta (The Oxford Companion to Wine) ia gwau, wain be “idaunegai taunimanima ese idia herevalaia momo muramurana.” Buka ma ta (The Origins and Ancient History of Wine) ese Paulo ena sisiba Timoteo dekenai ia hamomokania, ia gwau: “Eksperimen haida ese idia hahedinaraia typhoid bona gorere ma haida edia bakteria be wain ida idia mikisi neganai, unai bakteria idia mase haraga.” Hari idia karaia tahua gaukara ese idia hamomokania, wain lalonai gau idauidau 500 mai kahana idia noho. Unai gaudia haida ese typhoid ena bakteria idia hamasea, bona ma haida be muramura idauidau lalonai idia gaukaralaia.

[Futnout]

[Foto Rau Ai 26]

Nakht idia guria gabuna, Thebes, Aigupito ai, Gaukara taudia ese vain huahua idia moia

[Credit Line]

Gianni Dagli Orti/The Art Archive at Art Resource, NY