Dirava Ena Matanai Kuku Lau Gaukaralaia be Maoro o Lasi?

▪ Reana ta be unai bamona do ia henanadai, badina kuku ania karana be Baibel ese ia herevalaia lasi. Unai ena anina be Dirava ena lalohadai kuku ania karana dekenai ita laloparara be auka, a? Lasi.

Baibel ia gwau: “Toretore Helagadia be Dirava ena hahekau henunai idia torea.” (2 Timoteo 3:16) Baibel ai idia noho hakaua herevadia ese idia hahedinaraia Dirava ia ura iseda helt ita naria namonamo. Namona be tahua gaukara idia karaia taudia ese kuku ania karana dekenai idia davaria gaudia ita herevalaia guna, bena Baibel ena hakaua herevadia ida unai ia hegeregere dalana do ita itaia.

Kuku ese ta ena helt ia hadikaia bona mase ia havaraia diba. United States ai, kuku idia ania taudia faiv faiv amo ta ia mase. Ripoti ta (National Institute on Drug Abuse) ia gwau: United States ai, lagani ta ta lalonai kuku ania karana ese taunimanima momo ia hamasea, unai ese “alkahol, drag ania karana, ala-ala, ta sibona hamasea karana, aksiden, bona AIDS gorere amo idia mase taudia edia namba ia hanaia.”

Kuku ania taudia ese ma haida edia helt idia hadikaia. Herevana ta be kuku ia ania momo o kuku ena kwalahu sibona ia hahodi vareai, to unai ese ia hagorerea diba. Kuku ena kwalahu ese kuku idia ania lasi taudia 30 pesen bamona edia baragi ai kensa o kudou gorere ia havaraia diba. Vanegai laganidia lalonai, doketa ese idia davaria ta ena dabua dekenai kuku ena bonana ia noho neganai, unai ese ena helt ia hadikaia diba. Anina be kuku ena kwalahu ia ore murinai, kuku lalonai ia noho kemikol dikana ta be dabua, kapeti, bona ma gau haida dekenai ia noho. Unai kemikol dikana ese natudia edia helt bona edia harana ia hadikaia diba.

Kuku ese ta ia biagua diba. Kuku ania taudia be kuku ena hesiai taudia ai idia lao bamona. Momokani, tahua gaukaradia idia karaia taudia idia davaria kuku lalonai ia noho kemikol ladana, nicotine dainai taunimanima ese kuku ania karana idia rakatania be auka.

Edena dala ai ita herevalaia gaudia be Baibel ena hakaua herevadia ida idia hegeregere? Mani inai oi laloa:

Dirava ia ura mauri ita matauraia. Dirava ese Israela besena dekenai ia henia Taravatu ese ia hahedinaraia, Dirava idia ura hamoalea taudia be haida edia mauri idia matauraia be namo. (Deuteronomi 5:17) Israela taudia be edia ruma ena guhi isena ai magu maragina idia karaia. Dahaka dainai? Edia ruma ena guhi be palaka bona nega momo idia be unuseniai idia helai. Unai magu maragina ese edia famili bona ma haida idia gimaia idia moru o bero lasi totona. (Deuteronomi 22:8) Danu Israela taudia ese edia animal idia naria namonamo, taunimanima idia haberoa lasi totona. (Esodo 21:28, 29) Kuku ia ania tauna ese unai taravatu ena hakaua herevadia ia badinaia lasi. Ia be mai ena ura ida sibona ena helt ia hadikaia. Ma danu kuku ania karana amo ena dekena taudia edia helt ia hadikaia.

Dirava ia ura ia bona eda dekena taudia ita lalokau henia. Iesu Keriso ia gwau, iena murinai idia raka taudia ese mai anina bada taravatu rua idia badinaia be namo. (1) Dirava do idia lalokau henia mai edia kudouna, mauri, darana, bona goada ibounai ida, bona (2) edia dekena taudia idia lalokau henia, sibona idia lalokau henia hegeregerena. (Mareko 12:28-31) Mauri be Dirava ena harihari gauna, unai dainai bema ta be kuku ia ania, ia be unai harihari gauna ia matauraia lasi bona Dirava ia lalokau henia lasi. (Kara 17:26-28) Kuku ania tauna ese ma haida edia helt ia hadikaia, unai dainai ena be ia gwau ena dekena tauna ia lalokau henia, to unai be koikoi.

Dirava ia ura kara mirodia ita dadaraia. Baibel ese Keristani taudia ia hadibaia namona be “tauanina bona kudouna hamiroa gaudia ibounai amo ita goeva.” (2 Korinto 7:1) Momokani, kuku ania karana ese ta ia hamiroa diba. Haida be Dirava hamoalea totona idia ura kuku ania karana idia hadokoa, to idia mamia unai kara idia hadokoa be auka. To Dirava ena heduru amo unai kara idia hadokoa diba.