Inai Oi Diba, A?

Baibel negadiai, ta ese ena dabua ia darea karana ena anina be dahaka?

BAIBEL ese haida be sibona edia dabua idia darea edia sivarai ia herevalaia. Hari, Baibel idia duahia taudia do idia laloa unai be kara idauna ta, to Iuda taudia ese unai kara amo edia lalometau, hemarai, badu, o ta ena mase dainai lalohisihisi ena toana idia hahedinaraia.

Hegeregere, Rubena ia davaria ena palani Iosepa totona be ia guguru lasi badina Iosepa be igui hesiai tauna bamona idia hoihoilaia neganai, “iena dabua ia darea.” Edia tamana Iakobo ese “iena dabua ia darea” badina ia laloa Iosepa be uda boroma ta ese ia hamasea. (Gen. 37:18-35) Iobu ia kamonai ena natudia ibounai idia mase neganai, “iena dabua ia darea.” (Iobu 1:18-20) Gwaukau tauna ta, “iena dabua be idia darea,” be Hahelaga tauna badana Elia ena vairanai ia gini, bona ia hamaoroa Israela taudia be tuari ai Pilistia taudia ese idia halusia, Elia ena natuna rua idia hamasedia, bona taravatu mauana idia abia. (1 Sam. 4:12-17) Iosaia dekenai Taravatu bukana idia duahia neganai, ia ese ena taunimanima edia kerere ia lalopararalaia dainai, “iena dabua ia darea.”​—⁠2 Kin. 22:8-13.

Iesu idia kota henia neganai, Hahelaga Tauna Badana Kaiapa be Iesu ena hereva dainai, “ena dabua ia darea,” badina ia laloa Iesu be Dirava ena ladana ia hadikaia. (Mat. 26:59-66) Rabi taudia edia sene herevana ta ia gwau, bema tau ta ia kamonai ta ese Dirava ena ladana ia gwauraia dika, sibona ena dabua ia darea. Ierusalema dubuna idia hadikaia murinai, unai bamona sene herevana ma ta ia gwau, “hari inai negai, bema ta ia kamonai Dirava ena Ladana idia gwauraia dika, ena dabua do ia darea lasi, badina iena dabua be do ia darea patapata garina.”

Momokani, bema ta ena dabua ia darea to ia lalohisihisi momokani lasi, iena dabua darea karana be Dirava ese ia abia dae lasi. Unai dainai, Iehova ese ena taunimanima ia hamaoroa ‘edia dabua idia darea be hegeregere lasi momokani, to namona be edia kudouna do idia makohia, bona ia dekenai do idia giroa lou.’​—⁠Ioe. 2:13.