RAU 1 AMO | GURIGURI BE MAI ENA NAMO, A
Dahaka Dainai Taunimanima Idia Guriguri?
“Lau be laki gadara momo lau karaia tauna ta. Moni momo lau wini totona lau guriguri. To gau ta ia vara lasi.”—Samuel,a Kenya.
“Sikuli dekenai, ai idia hadibaia guriguri tamona ai gwauraia loulou.”—Teresa, Philippines.
“Hekwakwanai lau davaria negadiai lau guriguri. Danu, egu kara dika gwauatao bona Keristani hahine namona ai lau lao totona lau guriguri.”—Magdalene, Ghana.
Samuel, Teresa, bona Magdalene edia hereva amo idia hahedinaraia taunimanima be gau idauidau totona idia guriguri, haida be badina maorona dainai idia guriguri. Haida be mai kudouna ibounai ida idia guriguri; haida be guriguri idia gwauraia kava. To haida be sikuli ena eksam, o idia ura henia spot tim ia wini totona idia guriguri, o Dirava ese edia famili mauri ia durua totona idia guriguri. Taunimanima milioni be badina idauidau momo dainai idia guriguri. Momokani, tahua gaukarana ese ia hahedinaraia dubu idia lao lasi taudia danu be idia guriguri.
Oi guriguri danu, a? Bema oibe, dahaka gaudia totona oi guriguri? Herevana oi be guriguri karana oi manadalaia o lasi, to do oi laloa: ‘Guriguri karana be mai ena namo, a? Egu guriguri be ta ese ia kamonai, a?’ Buka torea tauna ta ia laloa guriguri karana ese ta do ia durua iena hekwakwanai be nega sisina lalonai ia laloaboio totona. Danu, doketa taudia haida idia laloa guriguri karana be, “muramura ta bamona.” Guriguri be vaia taunimanima ese idia karaia karana, a? Eiava guriguri karana be taunimanima edia hemami ia hanamoa totona, a?
To, Baibel ese ia hahedinaraia guriguri be taunimanima edia hemami ia hanamoa karana sibona lasi. To ita ia hadibaia ta be dala maorona ai bona Dirava ena ura hegeregerena ia guriguri neganai do ia kamonai. Unai be momokani, a? Badina haida mani ita itaia.
a Ladana ai haidaua.