Duahia Taudia Edia Henanadai

Dahaka dainai Mataio ese Iesu ena mauri sivaraina ia gwauraia dalana be Luka ena amo ia idau?

Mataio ese Iesu ena vara negana bona ena mauri sivaraina ia herevalaia dalana be Luka ena amo ia idau, badina unai Evanelia bukadia idia torea taudia rua be gabu bona nega idauidau ai unai sivarai idia torea.

Mataio bukana ese Iosepa dekenai idia vara gaudia ia herevalaia. Hegeregere, Iosepa ese Maria ena rogorogo sivaraina ia kamonai neganai ia karaia gauna; ena nihi ai aneru ese idia vara gaudia be ia dekenai ia gwauraia hedinarai; bona Iosepa ese unai hereva ibounai ia abia dae dalana. (Mat. 1:19-25) Ma danu, Iosepa ena nihi ta ai aneru ese ia hamaoroa Aigupito dekenai do ia heau lao; iena famili ida ia karaia laolaona; nihi ta ai aneru ese ia hamaoroa Israela tanona dekenai do ia giroa lou; Israela dekenai ia giroa lou; bona ena abia hidi, iena famili ida Nasareta ai do idia noho. (Mat. 2:13, 14, 19-23) Mataio ena Evanelia bukana ena karoa ginigunadia ai, Iosepa ena ladana be nega 8 ia hedinarai, to Maria ena be nega 4 sibona.

To, Luka bukana be Maria ia herevalaia momo. Unai buka lalonai Maria be aneru Gabriela ese ia vadivadi henia, ena varavara Elisabeta ia vadivadi henia, bona Maria ese Iehova ia hanamoa karana ia herevalaia. (Luka 1:26-56) Luka danu be Simeona ese Maria dekenai ia gwauraia herevana ia torea, unai be Iesu ese gabeai do ia davaria hahetoho ia herevalaia. Danu, Iesu ena mauri lagani be 12 neganai, Maria ena famili be dubu helaga idia vadivadi henia, to Luka ese Maria ena hereva ia torea Iosepa ena lasi. Luka ia gwau, unai nega ai idia vara gaudia dainai Maria ia laloa momo. (Luka 2:19, 34, 35, 48, 51) Luka ena Evanelia bukana ena karoa ginigunadia rua lalonai, Maria ena ladana be nega 12 ia hedinarai, to Iosepa ena be nega toi sibona. Unai dainai, Mataio bukana be Iosepa ese ia laloa momo gaudia bona do ia karaia gaukarana ia herevalaia, to Luka be Maria do ia karaia gaukara bona ena mauri ai idia vara gaudia sibona ia herevalaia.

Unai hegeregerena, Evanelia bukadia idia torea taudia rua ese bese ena lista idia torea dalana be ia idau sisina. Mataio bukana be Iosepa ena tubudia ia herevalaia bona ia hahedinaraia, Iesu, Iosepa ena ubua natuna be taravatu hegeregerena Davida ena king dagina ia abia. Dahaka dainai? Badina Iosepa be King Davida ena bese tauna, ia be Solomona ena iduhu amo ia vara. (Mat. 1:6, 16) To, Luka be Maria ena tubudia ia herevalaia bona ia hahedinaraia Iesu be mai ena maoro king dagina ia abia totona, badina ia be “Davida ena garana amo ia vara.” (Roma 1:3) Dahaka dainai? Badina Maria be King Davida ena bese amo ia mai, ia be Natana ena iduhu amo ia vara. (Luka 3:31) To dahaka dainai, Luka be ena bese lista lalonai Maria ia gwauraia lasi, Heli ena natuna? Badina Baibel negadiai bese ena lista idia torea neganai, tau sibona amo idia duahia matamaia. Unai dainai Luka ena bese lista ai Iosepa ia gwauraia, Heli ena natuna, unai ese ia hahedinaraia Iosepa be Heli ena ravana tauna.​—⁠Luka 3:23.

Mataio bona Luka ese idia gwauraia bese ena lista ese ia hahedinaraia Iesu be idia perovetalaia Mesia. Oibe, Baibel negadiai idia noho taudia momo be Iesu ia mai besena idia diba namonamo, Farisea bona Sadukea taudia danu be unai idia diba. Hari, Mataio bona Luka bukadia edia bese lista be iseda abidadama ena badina ai ia lao bona Dirava ese ia gwauraia gwauhamatadia ita abia dae diba.