Hari, Baibel be Ita Ia Durua Diba, A?

HAIDA IDIA GWAU LASI. Doketa ta ia gwau, ta ese Baibel amo haida ia hadibaia karana be tisa ese lagani 1920 kemistri bukana amo klas taudia ia hadibaia karana be hegeregere. Reana Baibel ia matauraia lasi tauna ta danu do ia henanadai, oi ese ia dika vadaeni kompiuta gunana ena manual ena heduru herevadia amo kompiuta matamatana oi update diba eiava. Oibe, haida idia laloa Baibel be buka gunana bona anina lasi.

Inai teknoloji tanobada ai, momo idia ura lasi Baibel ena heduru idia tahua. Badina, websait momo be sisiba bona hakaua hereva matamatadia idia halasia. Diba bada taudia, doketa, bona buka torea taudia be TV bona reidio lalodiai idia intaviu henidia. Bona stoa momo ai, taunimanima durua bukadia idia hoihoilaia bona moni bilioni momo idia abia.

Hari, taunimanima be diba matamata idia abia dainai, idia ura lasi Baibel—kahirakahira lagani 2,000 gunanai idia torea guguru bukana—idia stadilaia. Haida idia gwau bema Baibel ita gaukaralaia, unai be hegeregere kemistri buka gunana ta eiava kompiuta gunana ena manual ita gaukaralaia. To, unai lalohadai be kerere. Saiens bona teknoloji idia idau haragaharaga, to unai ese taunimanima edia mauri ia haidaua, a? Taunimanima idia laloa mauri be anina lasi, moale korikori idia tahua, idia ura famili maurina ia namo, bona ma haida ida idia hetura namonamo.

Ena be Baibel be buka gunana to ita ia durua diba. Danu, Baibel ia gwau, Dirava be haida amo ena hereva ia torea. Ma danu, Baibel ia gwau ita do ia hakaua bona hegaegaelaia hekwakwanai idauidau ita haheaukalaia totona. (2 Timoteo 3:16,17) Ma ia gwau, ena sisiba do idia noho ela bona hanaihanai. Oibe, Baibel ia gwau: “Dirava ena hereva be ia mauri noho.”—Heberu 4:12.

Oi laloa Baibel ena hereva be momokani, a? Oi laloa ia be buka gunana to mai anina bada, a? Inai Gima Kohorona be spesel magasin ginigunana bona oi do ia durua unai henanadai edia haere oi davaria totona.