Henanadai Mauana
● Kingdom Hall dekenai gaukara idauidau totona idia makaia kontribusen maua idauidau idia noho be namo, a?
Oibe. Namona be Kingdom Hall ai kongregesen ta ta ibounai ese kontribusen maua toi idia atoa bona edia ladadia be inai bamona idia torea hedinarai: 1. “Basileia Gaukarana Ena Kontribusen Monina.” Unai moni idia gaukaralaia, kongregesen ena gau idauidau edia davana idia karaia totona, bona Society dekenai kontribusen monina idia siaia edia ura hegeregerena idia gaukaralaia totona. Kongregesen momo be unai bamona idia karaia totona gwaubou monina be hua ta ta ibounai Society dekenai idia siaia. 2. “Society Ena Kingdom Hall Monina.” Unai moni ibounai be Society dekenai idia siaia bena idia ese Kingdom Hall idia ura haginia kongregesen idauidau dekenai idia henia torehai. 3. “Tanobada Hegegemadai Society Ena Gaukara Durua Monina—Mataio 24:14.” Unai moni ibounai be hua ta ta ibounai idia siaia lao brens opesi dekenai bona “kohu naria tauna mai ena kamonai” ena hakaua henunai idia gaukaralaia tanobada hegegemadai Iehova ena Witness taudia edia gaukara durua totona.—Luka 12:42.
Idia ura vaira negana ai edia Kingdom Hall do idia haginia eiava hanamoa kongregesen ese reana maua ma ta danu do idia atoa Kingdom Hall Haginia Monina totona, bona Society Ena Kingdom Hall Monina ena maua ida do ia noho. Unai amo pablisa taudia be sibodia edia kongregesen bona ma haida idia durua diba.
Nega haida (bema hegeregere, pura ta bamona vairanai) reana elda taudia ese kongregesen idia hadibaia idia gwauraia dinana dekenai do idia abia kontribusen ibounai be dika idia davaria taudia durua totona do idia gaukaralaia.
Namona be buka stadi idia karaia gabudia dekenai kontribusen maua idia noho. Unai gabudia amo idia abia monina be kongregesen ena akaun monina ida idia haboua.
Kontribusen oi henia neganai, oi naria namonamo maua maorona dekenai oi udaia. Unai gauna totona reana heduru gauna be elda taudia ese hadibaia herevana idia gwauraia. Ia maoro lasi ta ese maua idauidau dekenai idia atoa monina be ia ese ena ura maua dekenai ia atodia lou. Ia be ta ta ena maduna, kontribusen monina be maua maorona dekenai ia udaia karana amo ia hahedinaraia edena gauna totona unai moni ia henia.