Ita Gima Noho bona Ita Laloa Goada Noho

¹ Tanobada ena kara be idia idau momo, unai dainai, sekit hebouhebou bona 1991 ena hesiai lagani edia hereva kwarana be ‘Ita Gima Noho bona Ita Laloa Goada Noho.’ (1 Tes. 5:6) Unai hebouhebou be March ena hua dekenai do idia hamatamaia. Sekit tauna ese unai hebouhebou ena dina do ia gwauraia hedinarai neganai, namona be ita ibounai ita hegaegae, hebouhebou do ita lao henia totona.

² Hebouhebou ena hereva badana ta be kahana 4 herevana, bona unai hereva ese ita do idia durua ‘gau ibounai dekenai ita laloa goada’ totona. (2 Tim. 4:5) Reana guna iseda kara be namo lasi, to hari Satana ena idoa bona inai tanobada ena lauma be edena bamona do ita dadaraia diba? Unai hereva do ita kamonai hebouhebou dekenai bona namona be ita reaia lasi. Unai dina rua hebouhebou dekenai, ita do idia hadibaia sisiba namona be Questions Young People Ask​—Answers That Work bukana dekenai idia noho ita idia durua totona. Bema unai buka umui abia vadaeni, namona be hebouhebou dekenai do umui mailaia.

³ Namona be kekeni memero do idia hakala namonamo sekit naria tauna ese Saturday dinana dekenai idia do ia hereva henia neganai. Vaia, ita karaia hanaihanai bamona, idia hegaegae Saturday dinana dekenai bapatiso do idia karaia totona, bona gwauhamata idia karaia vadaeni taudia, bema idia ura bapatiso do idia abia, namona be edia kongregesen naria tauna idia hadibaia haraga.

⁴ Sunday dabai, haheitalai haida do ita itaia, idia ese ita do idia hadibaia ena be dika idia vara eiava ita kerere, to unai kara amo namo do ita davaria diba. Adorahi kahanai, distrik naria tauna ese pablik haroro do ia henia, ena ladana be “Kavakava Tanobadana Lalonai Ita Aonega Karaia.” Namona be Basileia pablisa taudia bona kamonai taudia ibounai do idia goada karaia unai hereva idia kamonai henia totona.

⁵ Mauri ena hekwarahi idia momo idia lao dainai, ai diba hebouhebou totona idia hegaegaelaia herevadia ese ita ibounai do ia durua bona do ia hagoadaia bada. Do ita itaia, lauma dalanai, edena bamona do ita gima noho diba, ita, iseda ruma bese, bona kongregesen taudia ita hagoadaia totona. Namona be iseda lalona ita hadaia hebouhebou ita lao henia totona, bona ita lao neganai, hereva ibounai ita kamonai henia namonamo. “Badina be ita kamonai hamatamaia nega dekenai iseda hahemauri be ia daudau, to harihari iseda hahemauri be ia kahirakahira vadaeni.”​—Roma 13:11.