Henanadai

● Dahaka dainai idia gwau pablisa taudia be edia kongregesen ena teritori mo sibona dekenai idia haroro be namo?

Gau ibounai be dala maoromaorona dekenai bona tiokratik dalanai ita karaia be gau badana. Aposetolo Paulo ia gwau: “Dirava be ia ura lasi hereva kava bona heai, ia be maino Diravana. . . . Ekalesia ena gaukara ibounai umui karaia namonamo, mai dala maorona, karaia kava lasi.”​—1 Kor. 14:​33, 40.

Ena be nega haida, lao dalana be lasi dainai, moni gaukara ena nega ia idau dainai, eiava gunalaia tauna lasi dainai, kongregesen ma ta dekenai ita lao haroro, to bema iseda ruma be kahirakahira ena kongregesen ena teritori dekenai ia noho, unai kongregesen dekenai ita lao be namo. Unai neganai haroro gaukara do ita karaia be ia auka lasi, to bema gabu daudau ena kongregesen dekenai ita lao grup taudia danu ita haroro totona do ita hekwarahi. Iseda ruma kahirakahira ena kongregesen dekenai ita lao neganai, ena grup taudia danu ita gaukara hebou diba bona kamonai matamata taudia ita davaria neganai, ita hakaudia diba edia ruma kahirakahira ena hebou gabuna dekenai. Bona ita dabu neganai, kahirakahira idia noho tadikaka bona taihu ese ita idia durua diba.

Namo lasi ita ura sibona ita gaukara, bona namona be Basileia ena gaukara ita laloatao, bona ita karaia kongregesen taudia idia gwauraia bamona. (Luka 16:10) Kongregesen matamatana ta idia haginia eiava ita be edena Kongregesen Buka Stadi dekenai do ita lao idia gwauraia neganai, reana ita haida ita ura iseda turana ia lao henia buka stadi dekenai ita lao, to kongregesen ena hereva ita badinaia neganai, ita be turana ma haida do ita davaria, unai neganai tiokratik orea lalonai iseda turadia do idia momo. Danu, bema kongregesen pablisa taudia be edia ruma kahirakahira ena kongregesen dekenai idia lao, elda taudia ese idia naria namonamo diba bona lauma dalanai idia hagoadaia be hekwarahi lasi.