Henanadai

◼ Bapatiso hebouna dekenai idia lao taudia be edena bamona edia moale idia hahedinaraia be namo?

¹ Bapatiso be moale negana. Matamata taudia ese Iehova ena kahana dekenai idia gini bona taunimanima vairanai edia abidadama idia hahedinaraia be ita itaia neganai, ita moale. (Salamo 40:8) Iesu ia gwau unai kara ese guba dekenai moale bada ia havaraia. (Luka 15:10) Bapatiso idia abia gwauraia taudia edia ruma bese taudia bona idia stadi henidia pablisa taudia idia moale, kamonai matamata taudia ese unai mai anina bada karana idia karaia neganai. To edia moale be dala maorona ai edena bamona do idia hahedinaraia goevagoeva diba?

² Hari inai negai Keristen bapatiso lalonai Iesu ena bapatiso dalana idia tohotohoa. Ia diba do ia karaia karana be mai anina bada gauna. Ia bapatiso negana lalonai ia guriguri noho. (Luka 3:​21, 22) Ia diba bapatiso negana be laloa namonamo negana. Iena hahediba taudia danu idia diba bapatiso be mai anina bada. Pentekoste, 33 C.E. ai, lauma helaga ia diho bona unai murinai taunimanima 3,000 bamona ese bapatiso idia abia. Unai bapatiso idia itaia hahediba taudia ese dahaka idia karaia? “Idia haboua hanaihanai, aposetolo edia hadibaia herevadia idia kamonai totona, bona turana idia karaia, aniani idia ania hebou, bona guriguri danu.” (Kara 2:​41, 42) Hahediba taudia ese lauma gaudia idia lalodia bona idia heabidae heheni.

³ Hari inai nega lalonai, Keristen hebouheboudia dekenai mai anina bada gauna be bapatiso. Taunimanima ese Iehova ena kahana dekenai idia gini dainai idia bapatiso be ita itaia neganai, iseda moale hahedinaraia totona iseda imadia ita hapatapataia bona hereva namodia ita henidia be maoro. To, iseda moale hahedinaraia totona ita boiboi badabada bona ita hioga, iseda imadia ita davedavea bona edia ladadia ita boiboilaia be maoro lasi. Bema unai bamona ita karaia, unai ese ia hahedinaraia unai mai anina bada bona mai helaga abidadama hahedinaraia karana ita laloa bada lasi. Danu, bapatiso idia abia taudia idia raka lasi neganai, unai be palaoapalaoa eiava harihari gaudia ita henia negana lasi. Bapatiso be hahemauri abia totona Keristen ena heau helulu karana ia matamaia sibona. Bapatiso idia abia taudia be mai eda moale danu ita hagoadaia diba, bona ita durudia bapatiso murinai Iehova idia turana henia karana idia laloa bada totona.

⁴ Namo lasi bapatiso gabuna dekenai ita hevaseha, ita gadara, ita nahu, eiava ma kara ta ita karaia; unai bamona kara ese bapatiso ena anina bada toana do ia hadikaia diba. Namona be iseda moale be dala namona dekenai do ita hahedinaraia. Bema iseda kara ia namo bona ita hahedinaraia ita diba unai be mai anina bada negana, taunimanima iboudiai do idia moale diba.