Basileia Habadaia Gaukarana Durua Dalana
1 “Kara momo idia idau!” “Haraga herea ia vara!” “Iseda Soviet Union tadikakadia dekenai unai be hahenamo bada gauna!”
2 August dokonai bona September imatamanai haida be unai bamona idia hereva. Ena be hekwakwanai ia vara diba, to Soviet Union dekenai hebouhebou idia abia neganai hekwakwanai be ia vara lasi. Lagani 1991 ai, edia siahu negana lalonai, Soviet Union dekenai hebouhebou 7 idia karaia bona idia lao taudia be 74,252, bona 7,820 ese bapatiso idia abia. Ma danu, East Europe dekenai taunimanima 295,924 be hebouhebou dekenai idia lao.
3 Momokani, Keristen taudia ginigunadia edia negai hegeregerena, peroveta tauna Isaia ena hereva be hari idia guguru, ia gwau: “Dibura ai idia raka taudia ese diari badana idia itaia vadaeni. . . . Bese oi hahutuma vadaeni, bona ena moale oi habadaia vadaeni. Idia be oi vairanai idia moale, uma ena anina gogoa negana ena moale bamona.” Oibe, Basileia gaukarana be ia bada ia lao! Iesu Keriso be ia pavapava vadaeni! Bona unai peroveta herevana be ma ia gwau: “Iena lohia siahuna habadaia karana bona maino do idia doko lasi.”—Isa. 9:2, 3, 7.
4 East Europe dekenai, gaukara ia bada ia lao bona unai gaukara naria namonamo totona, Germany lalonai edia printa gabuna idia habadaia. Unuseniai iseda tadikaka be mai moale danu unai gaukara idia durua, bona unai ese Iesu ena peroveta herevana ia hagugurua, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.”—Mat. 24:14.
5 United States dekenai gaukara be ia bada ia lao momokani. September lalonai, Gilead School ena kosi haorea totona idia hebou lalonai, idia gwau murina Gilead klas be April lalonai do idia karaia bona ia dekenai do idia vareai taudia be nega rua amo do idia habadaia, ia lao taunimanima 50 bamona klas ta ta iboudiai dekenai! Gabeai unai sikuli do idia karaia Watchtower Educational Center dekenai, kahirakahira idia ore lagani toi lalonai unai ruma idia haginia noho Patterson, New York dekenai. Taunimanima momo be inai bamona idia henanadai, idia gwau: “Patterson dekenai idia karaia gaukarana be edena bamona?”
6 Patterson Dekenai Idia Haginia Rumadia: Ai moale badina unai rumadia haginia gaukarana be sediual ia gwauraia ena nega hegeregerena lasi, to idia karaia haraga. Idia haginia vadaeni rumadia 7 edia ladana be Patterson Inn, bona unuseniai mahuta daiutu ta ta iboudiai be 150. Ia be Educational Center rumana kahirakahira dekenai bona aena amo oi raka henia diba. Danu, raka daladia, motuka atoa gabuna, bona gabu hahairaia umana idia karaia haorea vadaeni. Educational Center rumana do idia haorea neganai, unai kahirakahira ia noho Patterson Inn rumana do idia gaukaralaia tanobada ena kahana idauidau amo idia mai vadivadi taudia be unuseniai do idia mahuta totona. To, ela bona unai nega ia ginidae, unai ruma haginia gaukara idia karaia Betele taudia 300 bamona ese Patterson Inn rumadia idia noholaia.
7 Hari, davana lasi dekenai unai ruma idia haginia gaukara taudia iboudiai be 650 bona ma haida! Lagani 1991 imatamanai, New York Times niuspepa lalonai toretore tauna ta ia gwau: “Putnam County ena north east kahana dekenai, Route 22 ena dala badana ataiai unai Patterson rumadia be ororo dekenai idia noho bona idia be siti ta bamona, bona ruma haginia gaukara idauidau idia karaia . . . iboudiai—enjinia, ruma palani karaia, palani torea, kapenta, simenisi karaia, paua, ranu bona maduna huaia gaukara taudia—iboudiai be dubu taudia, idia haida be pura haida bona idia haida be lagani haida idia volantia unai gaukara idia karaia totona. Idia be gaukara davana idia abia lasi, to hua ta ta iboudiai heduru moni sisina idia abia edia ura gaudia idia hoia totona.”
8 Unai ruma haginia volantia taudia ese hahenamo momo idia davaria. Oibe, unai gaukara karaia totona, lauma dalanai idia goada volantia taudia sibodia idia abia hidi. (1 Kor. 2:14, 15) Daba daba iboudiai dina ena siri idia kikilaia. Monday hanuaboi iboudiai ruma haginia taudia durudia totona, Gima Kohorona stadi idia karaia. Patterson rumadia mo sibona lasi, to New York dekenai ruma haginia gaukarana idia karaia danu. Brooklyn dekenai dahaka idia karaia?
[Questions]
1-3. August bona September lagani 1991 dekenai, Isaia 9:2, 3, 7 edia hereva be edena bamona idia guguru?
4. Germany tadikakadia be edena bamona idia heduru Mataio 24:14 ena hereva idia hagugurua totona?
5. September gunana lalonai, Gilead kosi idia haorea totona idia hebou lalonai, dahaka idia hadibaia?
6. Patterson Inn be dahaka? Hari idia noholaia taudia be daidia? Dahaka dainai ita gwau diba bema ita lao unuseniai ita ta ta ibounai be do ita noho diba?
7. New York Times niuspepa ena toretore tauna ta ese Patterson rumadia haginia gaukarana be edena bamona ia herevalaia?
8. Ruma haginia gaukara idia karaia taudia ese lauma dalanai dahaka hahenamo idia davaria? Edena ruma haginia gaukara sivaraina ita do kamonai henia lasi?
This article has been taken partly from km-E 12/91 “Sharing in Kingdom Expansion.”