Sivarai Namona Harorolaia—Iehova Ena Lauma Helaga Ena Heduru Amo
1 Basileia hesiai gaukara lalonai ita kwalimu totona, gau badana be Iehova ese ita ia durua bona iseda gaukara ia hanamoa. Iehova ena lauma helaga ena heduru ita abia totona, gau badana be iseda guriguri amo Iehova ita noia, badina Iesu ese ena hahediba taudia ia hamaorodia, Dirava ese ia idia noia taudia dekenai ena lauma helaga do ia henidia.—Luka 11:13.
2 Taunimanima haida dekenai ita haroro gwauraia neganai, reana do ita laloa namona be ita hegaegae namonamo guna. (Korinto Ginigunana 2:1-5 itaia danu.) To, bema Dirava ena lauma helaga ita noinoilaia, unai lauma helaga ese ita do ia durua, hereva momokani ita gwauraia maoromaoro bona goevagoeva totona.
3 Lauma helaga ese ita do ia durua, hereva momokani be “taunimanima ibounai” dekenai do ita gwauraia hedinarai mai gari lasi. (1 Tim. 2:3, 4; 1 Tes. 2:2) To, ita gari lasi ena anina be taunimanima ita haroro henidia neganai ita hereva auka eiava ita doridia, a? Lasi momokani.
4 Lauma Helaga Ena Huahua Havaraia: Aposetolo Petro ia gwau, ita haroro neganai, namona be “mai hemataurai bona manau danu” ita hereva. (1 Pet. 3:15) Manau be lauma helaga ena huahua ta, bona ruma taudia be ita idia badu henia neganai, unai kara ita hahedinaraia be gau badana. Lauma helaga ena huahua ma haida ese ita do idia durua, hekwakwanai idauidau ita haheaukalaia totona. (Gal. 5:22, 23) Taunimanima ese iseda haroro idia dadaraia neganai, namona be ita diba ita idia dadaraia lasi, to, reana ita gwauraia sivaraina ena namo idia lalo-pararalaia lasi. Unai lalohadai ita abia neganai, heduru do ita abia manau bona hemataurai ita hahedinaraia totona. Ruma tauna ita rakatania neganai, bema dala ia noho, namona be hanamoa herevana ta be ia dekenai ita gwauraia. Reana unai ese badu tauna ena lalona do ia hakerua.—Her. 15:1.
5 Ruma ta ruma ta gaukara ita karaia o dala dekenai ita haroro neganai, taunimanima ese iseda kara idia itaia. Iseda hereva bona kara be nega ibounai idia namo bona taunimanima idia maumauraia diba lasi be gau badana. Taunimanima haida ese iseda haroro gaukara idia dadaraia. Idia momo idia ura lasi idia kamonai. To namona be ita laloatao, mamoe bamona taudia ita tahudia noho. (Mat. 10:12-14) Haroro gaukara ita karaia neganai, namona be iseda kara namo amo Dirava ita hanamoa, iena lauma helaga amo ia mai huahuadia be ita dekenai idia hedinarai dainai. Bema taunimanima ita kara namo henidia bona edia namo ita laloa, reana idia haida edia kudouna do ita hamarerea.—2 Kor. 6:3.
6 Bema ruma tauna ia bisi momokani, reana hereva haida sibona ita gwauraia diba. To, ruma tauna ita laloa dainai, reana gabeai, Witness tauna ta ia mai haroro neganai, unai ruma tauna do ia ura kamonai. Dirava ena lauma helaga ese ita do ia durua, lalokau, haheauka, bona hebogahisi ita hahedinaraia totona. Ita moale, badina Dirava ena hebogahisi dainai taunimanima momo ese Bible ena sivarai idia kamonaia diba, bona unai dala amo idia haida be gabeai Bible ena hereva idia abia dae.—1 Kor. 13:4.
7 Bema dala ita kehoa Dirava ena lauma helaga ese iseda gaukara ia biagua totona, Basileia sivaraina ita gwauraia neganai, kudou-maoro taudia, Dirava habadua garina idia gari taudia, do idia kamonai mai edia ura danu. Namona be ita hekwarahi ‘hairai bona mataurai Sivarai Namona dekenai ita havaraia’ totona.—Tito 2:10.
HAHEITALAI 1: Pablisa ta be ruma ta ruma ta gaukara ia karaia. Pablisa ese Kiki Herevana ia gwauraia sisina neganai, mai badu danu ruma tauna be ena hereva ia utua. Pablisa be ia badu sisina bona hereva aukana ta ia henia.
Inai hereva ia naria tadikakana ese ia hahedinaraia unai pablisa tauna be Tito 2:10 ena hereva ia badinaia lasi.
HAHEITALAI 2: Pablisa ese ena hereva do ia gwauraia lou, to ruma tauna ia badu neganai, ia ese hereva manauna ia henia.
Inai hereva ia naria tadikakana ese ia hahedinaraia manau hereva henia karana ena namo be dahaka.
[Questions]
1. (a) Luka 11:13 ena hereva ese dahaka ia gwauhamatalaia Keristen taudia dekenai? (b) Dahaka dainai Dirava ena lauma helaga be gau badana, haroro gaukara ita karaia neganai?
2. (a) Paulo ese Korinto kongregesen ia vadivadi henia neganai, iena lalohadai be dahaka? (b) Bema Iehova ita noia, dahaka do ia henia ita ta ta ibounai dekenai?
3. “Taunimanima ibounai” ita haroro henidia neganai, 1 Timoteo 2:3, 4 ena hereva be edena bamona ita ia durua? Bema tanobada ena tau badadia eiava siahu taudia dekenai ita haroro, dahaka dainai ita gari lasi be namo?
4. (a) Taunimanima ese ita idia badu henia neganai, dahaka ese ita do ia durua, manau bona hemataurai ita hahedinaraia totona? (b) Hereva Lada-isidia 15:1 ena sisiba namona be dahaka?
5. (a) Dahaka dainai haroro gaukara ita karaia neganai, taunimanima ita kara namo henidia be namo? (b) Bema taunimanima ese iseda haroro idia dadaraia, dahaka dainai ita lalohisihisi bada lasi be namo? (c) Korinto Iharuana 6:3 ena hereva hegeregerena, dahaka dainai namona be nega ibounai ita hekwarahi, kara namodia karaia totona bona hereva namodia gwauraia totona?
6. Hari inai nega lalonai, edena dala ai Iehova ese taunimanima dekenai lalokau bona haheauka ia hahedinaraia?
This is a repeat of article in km 5/92 taken from km-E 3/88 “Presenting the Good News—With Help From Jehovah’s Spirit.”