Kingdom Hall Oi Laloa Bada, A? Oi Matauraia, A?
1 Iseda hanua lalonai ruma iboudiai amo Kingdom Hall be mai anina bada ita dekenai. Oi laloa bada, a? Oi matauraia, a?
2 Dahaka dainai ita dekenai ia be mai anina bada rumana? Badina ia be iseda tomadiho gabuna dainai. Iehova ena taunimanima idia hebou neganai Iehova idia tomadiho henia totona, ena be Dirava idia itaia lasi to iena lauma helaga ia noho. Keriso Iesu danu ia gwauhamata, ia gwau tomadiho totona iena hahediba taudia rua eiava toi idia hebou neganai, ia be idia ida ia noho! Iseda hebou dekenai Iehova bona Keriso Iesu idia noho be hahenamo badana momokani!
3 Iseda Kingdom Hall be Iehova ena ladana ia hahedinaraia. Kingdom Hall ena saini ta dekenai dahaka ita torea? Ita torea herevana be inai: “Iehova ena Witness Taudia edia Kingdom Hall.” Basileia (Kingdom) be Bible ena hereva badana. Unai dainai unai saini ese Iehova ena ladana ia hahedinaraia. Daika sibodia be Basileia ena sivarai idia harorolaia tanobada ibounai lalonai? Ita Iehova ena Witness taudia sibona, ani?
4 Oibe, iseda hanua lalonai ruma iboudiai amo Kingdom Hall be mai anina bada ita dekenai. Momokani ena be unai bamona ita laloa, to ita matauraia momokani, a?
5 Ita laloaboio lasi, kongregesen ena tano bona ruma be ‘Basileia ena kohu’ bona ita matauraia be gau badana badina ia be ‘Basileia gaukarana’ ia durua dainai. Taunimanima be aedia amo eiava motuka amo iseda Kingdom Hall idia hanaia neganai dahaka idia laloa?
6 Namona be iseda Kingdom Hall ena saini ita laloa guna. Ena toana ia namo bona ia goeva, a? Bema ia dika sisina namona be ita hanamoa. Bema magu ia noho, ena toana be ia namo, a? Unai gabu totona ia hegeregere, a? Geiti be ia hegeregere, a? Bema Kingdom Hall tanona ena hetoana dekenai, palaoapalaoa ita hadodia magu bamona, ita utudia namonamo toana ia namo totona, a?
7 Hari, namona be Kingdom Hall ena tano ita laloa. Rei ita utua namonamo bona ranu ita henia dainai toana ia namo, a? Sisia eiava boroma be idia loaloa kava unuseniai, a? Bema oibe, tano idia hamiroa, bonana dikana ia noho bona lao do idia mai bona unai amo gorere idia vara diba. Mei gabudia be ruma lalonai eiava ruma murimurinai? Herevana edeseniai idia noho, to gau badana be idia goeva bona bonana dikana ia noho lasi. Hanaihanai toilet pepa ia noho, a? Bema imana huria besini ia noho, sopu bona tauele danu idia noho, a? Mei rumana bona ia lalonai idia noho gaudia be hanaihanai idia goeva, a? Namona be hebou vairanai bona murinai mei rumana do idia sekea unai gaudia idia noho totona. Madi, nega momo mei rumana idia naria namonamo lasi dainai ena toana ia dika bona ia be mai ena bonana danu.
8 Ita kikilaia vadaeni gaudia naridia totona be moni bada ia ania lasi. Namona be ita laloa namonamo bona do ita ura gau iboudiai do idia namo, badina kongregesen ena gau iboudiai idia noho ‘Basileia gaukarana’ idia naria totona. Oibe, iseda nega bona gaukara auka amo Basileia gaukarana ita naria diba!
9 Kongregesen lalonai dagi idia abia taudia be idia gaukara goada Basileia gaukarana idia naria totona. Bema ita dekenai idia mai badina idia ura ‘gaukara’ ta ita karaia totona, namona be mai moale danu idia ita durua. Aposetolo Paulo be 1 Korinto 16:16 dekenai ita ia sisiba henia, ia gwau: “Inai bamona taudia edia hereva do umui kamonai henia. Bona inai taudia danu idia gaukara hebou bona durua taudia, idia do umui kamonai henia danu.”
10 Hari, iseda Kingdom Hall ena toana ia namo noho dalana ita kikilaia vadaeni. Taunimanima haida idia gwau ‘nega ginigunana oi itaia gaudia be oi lalodia hanaihanai.’ Unai dainai nega ginigunana taunimanima ese iseda Kingdom Hall idia itaia neganai, ita ura do idia laloa ita be Iehova bona ena orea hanamoa bona matauraia bada taudia, a?
This article is unique to PNG.