Iehova ena Hesiai Gaukarana Habadaia
1 Nega Namodia Iboudiai Umui Haroro: Iehova ena Witness taudia idia ura edia diari do idia hahedinaraia hanaihanai. Unai idia karaia tanobada ibounai dekenai.—Mat. 5:16; Fil. 2:15.
2 Kongregesen 69,000 mai kahana iboudiai amo, pura ta ta iboudiai lalodiai pablisa idia hebou haroro gaukara totona. Namona be unai negadia sibodia dekenai lasi, to nega ma haida dekenai danu Basileia Sivaraina idia harorolaia.
3 Gabu Idauidau Ai Bona Nega Idauidau Ai Haroro: Haroro gaukara be gabu idauidau ai bona nega idauidau ai idia karaia dainai, taunimanima momo idia durudia vadaeni, hereva momokani do idia diba totona. Bema tanobada ibounai lalonai idia noho pablisa 4 milion mai kahana ese unai do idia karaia momo, taunimanima milion momo, varavara taudia, dekena taudia, idia ida idia gaukara hebou taudia, sikuli turadia, bona taunimanima ma haida danu ese sivarai namona do idia kamonai diba! Iseda tadikaka momo be mai edia dala nega idauidau ai bona gabu idauidau ai do idia haroro, hegeregere PMV eiava peleini dekenai idia guia neganai. Aniani rumadia ai eiava hotel ai idia noho neganai, eiava idia holide neganai, reana dala do idia noho haroro gaukara do idia karaia totona. Bema hospital dekenai idia noho, reana doketa taudia, nesi taudia, eiava gorere taudia ma haida dekenai idia haroro diba.
4 Oi hegaegae hanaihanai totona gabu idauidau bona nega idauidau ai do oi haroro diba totona, Bible bona Bible ia gwauraia bukadia o magasinidia be oi dekenai idia noho hanaihanai, a? Doketa tauna oi lao henia neganai, buka o magasin oi abidia lao, a? Dina tubu ai do oi haroro totona, emu gaukara gabuna dekenai oi abidia lao, a?
HAHEITALAI: Mani oi hegaegaelaidia namonamo. Bema oi hegaegaelaidia namonamo lasi, haheitalai ese tadikaka bona taihu do idia durudia momokani lasi.
Karaia dalana: Witness tauna ta, Tom, bona ia ida idia gaukara hebou taudia haida idia helai noho; edia aniani idia ania ore gwauraia.
Gaukara Tauna Namba 1: Niuspepa ia gwau, varani hanuaboi ai henaohenao taudia ese K50,000 idia henaoa.
Gaukara Tauna Namba 2: Namona be gavamani ese henaohenao taudia idia kara auka henidia bona edia dika ena davana ia habadaia, taravatu idia utua dainai!
Tom: Gavamani momo ese taravatu utua karana idia koua toho, Papua New Guinea dekenai sibona lasi, to tano iboudiai lalodiai danu. Umui laloa gavamani ta ese maino momokani do ia havaraia diba, a?
Gaukara Tauna Namba 1: Unai be henanadai namona. Lau ese unai bamona gavamani ta lau itaia lasi.
Gaukara Tauna Namba 2: Lau laloa dala tamona be, gavamani iboudiai be do idia hekwarahi noho.
Tom: Oibe, guna unai bamona lau laloa. To hari lau diba ena be taunimanima ese gavamani namona ta idia havaraia diba lasi, to Siahu Ibounai Diravana ese ta do ia havaraia. Umui laloa unai be do ia vara momokani, a?
Gaukara Tauna Namba 1: Tom, emu hereva ena anina be dahaka? Oi laloa taunimanima ese idia karaia gaudia be Dirava ese ia laloa, a?
Tom: Iesu ese Keristen taudia ia hamaorodia, do idia guriguri Dirava ena Basileia, ena gavamani unai, do ia mai bona maino be inai tanobada dekenai do ia havaraia, maino be gubai ia noho hegeregerena. Reana emui mauri lalonai unai guriguri umui laloatao danu.
Gaukara Tauna Namba 1: Tom, unai be hereva namona, reana unai hereva be momokani, to unai sibona ese lau dekenai do ia hamomokania diba lasi.
Tom: Kerukeru lauegu Bible do lau abia mai, bona reana unai ita do kikilaia lou diba.
Hereva Henia Tauna: (Hereva henia tauna ese Tom ena hereva ia utua, bena ia gwau: “Tom ena hereva be namo, to reana ia hanamoa diba, a? Mani ena hereva dokona ita kamonai lou.”)
Gaukara Tauna Namba 1: Tom, unai be hereva namona, reana unai hereva be momokani, to unai sibona ese lau dekenai do ia hamomokania diba lasi.
Tom: Egu seipi dekenai lauegu Bible ia noho. Lau ura Bible ena hereva lau duahia. Mani umui kamonai. (Ena Bible ia abia mai bona Mataio 6:9, 10 ia duahia.) Inai buklet danu lau abia mai. Ia ese inai basileia o gavamani ia gwauraia bona paradaiso be inai tanobada dekenai do ia havaraia dalana ia herevalaia. (Inai Gavamani ese Paradaiso Do Ia Mailaia buklet be idia ta ta dekenai ia henia.)
Gaukara Tauna Namba 2: (Buklet ia raraia noho) Ia be buklet namona, Tom. Inai buklet ta lau abia diba, a? Ena davana be hida?
Tom: Ia namo, unai buklet oi abia. Ena davana be 30 toea sibona.
Gaukara Tauna Namba 1: Lau danu lau ura buklet ta do lau abia.
Hereva Henia Tauna: Haheitalai iharuana be namo. Badina be dahaka? Badina Tom ia hegaegae idia dekenai buklet haida do ia hariharilaia toho totona. Oi hegaegae gabu idauidau ai bona nega idauidau ai do oi haroro totona, a? Namona be dala oi karaia, bena herevana oi be uma gabu dekenai, sikuli dekenai, opesi dekenai o gabu ma ta dekenai, do oi hegaegae oi haroro totona, ani?
This article is unique to PNG.