Baibel Stadi Taudia Durudia Stadi Totona Do Idia Hegaegae
1 Pura ta ta iboudiai edia stadi totona idia hegaegae Baibel stadi taudia ese idia hahedinaraia idia ura momokani idia stadi, bona nega momo unai taudia be lauma dalanai idia tubu haraga, to idia hegaegae lasi taudia idia tubu haraga lasi. Nega haida, stadi tauna ia hegaegae lasi badina stadi hegaegaelaia dalana ia diba lasi. Bema unai bamona, namona be hegaegaelaia dalana ita hadibaia. Edena bamona unai ita karaia diba?
2 Stadi oi hamatamaia negana amo, nega sisina oi atoa bona stadi tauna oi hadibaia stadi totona ia hegaegae ena anina be sibona ia stadi. Taunimanima momo, ena be idia duahiduahi diba, to stadi dalana idia diba lasi.
3 Stadi Tauna Dekenai Stadi Karana Ena Namo Oi Hahedinaraia: Reana oiemu stadi buka lalonai oi makaia hereva badadia be stadi tauna dekenai oi hahedinaraia diba. Oi hadibaia, bema unai hereva ia makaia, ia itaia neganai hereva ena anina do ia lalohadailaia haraga diba bona sibona ena hereva amo do ia gwauraia diba. Bena haere ia henia neganai buka ena hereva ibounai do ia duahia lasi. Stadi dalana bema oi hadibaia namonamo, unai ese ia durua bena gabeai kongregesen heboudia dekenai mai anina bada haere do ia henia diba. Ia haere neganai, unai ese ia hahedinaraia hebou dekenai ia kamonai herevadia ia laloa bada bona hereva ia lalo-pararalaia momokani.
4 Baibel Gaukaralaia Dalana Oi Hadibaia: Stadi lalonai idia torea hedinarai Baibel siridia be ena Baibel lalonai ia davaria diba dalana oi hadibaia be namo. Unai ia karaia diba namonamo neganai, do ia lalo-parara ia be Baibel stadilaia tauna ta. Ena be guna reana Baibel buka idauidau ia davaria totona Baibel ena rau ginigunana ta dekenai buka edia lista amo ia tahudia, to namona be oi hadibaia Baibel buka 66 idia noho gabudia ia diba totona. Baibel siri ta ia kehoa bona ia duahia neganai, namona be oi durua bena unai siri amo edena hereva sibona ese umui stadilaia paragraf ena hereva ia hamomokania oi hadibaia.
5 Stadi tauna ena diba ia bada ia lao neganai, oi hagoadaia Baibel ena hereva ginigunana ela bona dokona do ia duahia totona. Oi gwauraia bada gauna be inai: Baibel ibounai be Dirava ena Hereva bona ena lauma helaga ena siahu amo idia torea, bona Keristen momokani taudia be ia dekena amo lauma dalanai idia aniani be gau badana.—Mat. 4:4; 2 Tim. 3:16, 17.
6 Tiokratik Buka Ma Haida Gaukaralaia Dalana Oi Hadibaia: Stadi tauna ena diba ena bada ia hegeregere neganai, ia ese tiokratik buka ma haida ia gaukaralaidia diba. Mai lalo-parara danu, oi hagoadaia Society ena buka bona magasin dekena amo sivarai ma haida do ia tahudia totona, badina kongregesen heboudia dekenai ia lao neganai unai buka do ia gaukaralaidia. Bema English ia diba, New World Translation Baibel ena kahana idauidau gaukaralaia dalana oi hadibaia, hegeregere “Bible Words Indexed” kahana. Ia sibona ena tiokratik laiberi ia haboua hamatamaia neganai, Comprehensive Concordance, Buka Helaga Herevalaia, Index, bona Insight bukadia gaukaralaidia dalana oi hadibaia.
7 Bema Baibel stadi taudia ese edia stadi totona do idia hegaegae dalana ita hadibadia, ita durudia hereva momokani dekenai idia goada idia lao totona, bona ena be gabeai idia dekenai Baibel stadi ita karaia lasi, to idia be sibodia Baibel idia stadilaia noho diba.
This article is repeated in km 4/96.