Keristen Tauna Ta ai Oi Lao Ena Anina
1 Iesu be iena murinai raka taudia ia boiridia, ia gwau: “Tau ta bema ia ura lauegu murina dekenai do ia raka, ia sibona ena ura do ia laloa lasi, iena satauro do ia huaia, lauegu murina dekenai do ia raka.” (Mat. 16:24) Keristen momokani taudia be mai edia abidadama Iesu Keriso be Dirava ese ia Horoa tauna bona Ia sibona ia havaraia Natuna tamona, taunimanima totona iena tanobada maurina ia bouboulaia Gwauhamata Garana, toreisi lou ia abia bona idia abia isi Iehova ena idibana ai ia helai totona, bona siahu ia abia ena inai taudia ia kwalimu henidia bona Iehova ena lohia ia hamomokania totona. (Mat. 20:28; Luka 24:46; Ioane 3:16; Gal. 3:16; Fil. 2:9-11; Heb. 10:12, 13) Keristen taudia idia laloa Baibel be Dirava ena lauma dainai idia torea Hereva, hereva momokanina, bona mai ena namo taunimanima ia hadibadia bona ia sisiba henidia totona.—Ioane 17:17; 2 Tim. 3:16; 2 Pet. 1:21.
2 Keristen taudia be idia abidadama sibona be hegeregere lasi. Unai abidadama be kara amo idia hahedinaraia be namo. (Roma 10:10; Iak. 2:17, 26) Kara dika lalonai idia vara dainai, Keristen ai idia lao taudia idia helalo-kerehai, edia lalona idia haidaua, Iehova dekenai edia mauri idia gwauhamatalaia, idia tomadiho henia bona idia hesiai henia totona, bena ranu bapatiso idia abia. (Mat. 28:19; Kara 2:38; 3:19) Namona be idia goeva bona idia heudahanai lasi, kaivakuku idia tomadiho henidia lasi, bona rara idia ania lasi. (Kara 15:20, 29) Edia kara gunadia idia negedia, unai be badu, hereva dika, koikoi, henaohenao, inuinu kekero, bona “unai bamona kara ibounai,” bona edia mauri be Baibel ena hahegani hegeregeredia idia halaoa. (Gal. 5:19-21; 1 Kor. 6:9-11; Ef. 4:17-24; Kol. 3:5-10) Petero be Keristen taudia ia tore henidia, ia gwau: “Ia namo lasi bema umui ta ia hisihisi, sibona ena kerere dainai. Tau ta sedira ia ala-ala, o ia henaoa, o ia kara dika, o haida edia kara ia herevalaia kerere, bona unai kara dainai ia hisihisi. Unai bamona hisihisi be mai ena hahenamo ta lasi.” (1 Pet. 4:15) Namona be Keristen taudia idia hebogahisi bona haida edia mamina idia laloa, idia manau bona idia haheauka, lalokau dekenai sibodia edia ura idia biagua. (Gal. 5:22, 23; Kol. 3:12-14) Sibodia edia ruma bese idia naridia, bona sibodia idia lalokau henia hegeregerena edia dekena taudia idia lalokau henidia. (1 Tim. 5:8; Gal. 6:10; Mat. 22:36-40; Roma 13:8-10) Keristen taudia be idia helalokau heheni dainai taunimanima idia diba idia be Keristen momokani taudia. Iesu ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.”—Ioane 13:34, 35; 15:12, 13.
3 Keristen momokani taudia be Iesu ena kara idia tohotohoa, ia be haheitalai Hadibaia Tauna Badana bona Iehova Ena Abidadama Witness tauna. (Ioane 18:37; Apok. 1:5; 3:14) Ia Gunalaidia tauna ena hahegani be inai: “Umui lao, bese ibounai be diba tahua taudia do umui halaoa.” (Mat. 28:19, 20) Unai idia karaia neganai, Keristen taudia be ‘taunimanima vairanai bona ruma ta ruma ta dekenai,’ taunimanima idia boiridia Babulono Badana amo idia heau siri bona Dirava ena Basileia idia helaro henia bona idia tabekau henia. (Kara 5:42; 20:20, 21; Apok. 18:2-4) Unai be sivarai namona momokani, to unai sivarai idia harorolaia neganai Keristen taudia be dagedage bona hisihisi bada idia abia, Iesu Keriso ese ia mamia hegeregerena. Iena murinai idia raka taudia be unai danu do idia davaria; bema ia bamona idia karaia, unai be namo. (Mat. 10:24, 25; 16:21; 24:9; Ioane 15:20; 2 Tim. 3:12; 1 Pet. 2:21) Petero ia sisiba, ia gwau, bema tau ta be “Keristen tauna dainai ia hisihisi, unai tau be do ia hemarai lasi. Lasi momokani, to Dirava do ia tanikiu henia, Keriso ena ladana ia abia dainai.” (1 Pet. 4:16) Keristen taudia be “Kaisara” dekenai lohia taudia ese idia gwauraia gaudia idia henia—idia matauraidia, bona takisi idia henia—to unai idia karaia neganai, tanobada karadia amo idia gini siri (Mat. 22:21; Ioane 17:16; Roma 13:1-7), bona unai dainai tanobada ese do idia inai henidia.—Ioane 15:19; 18:36; 1 Pet. 4:3, 4; Iak. 4:4; 1 Ioane 2:15-17.
4 Unai dainai ita diba dahaka dainai Keristen gunadia edia nega lalonai taunimanima ese inai bamona taudia idia herevalaidia momo: mauri ena taravatu kara namo dekenai idia badinaia taudia, bona idia kara namo taudia, gari lasi dekenai mai siahu sivaraina idia harorolaia goadagoada taudia. Hegeregere inai bamona, Paulo ena misinari laolaodia be siti momo ia aradia lahina ta bamona—laolao ta be Antioka Pisidia dekenai, Ikonio, Lustera, Derebe, bona Peregamo dekenai; ma laolao ta be Filipi, Tesalonika, Berea, Atena, bona Korinto dekenai. Ena kara dainai taunimanima ese unai sivarai idia laloa, bona edia lalona idia hadaia, Dirava ena Basileia ena sivarai namona idia abia dae eiava idia dadaraia. (Kara 13:14–14:26; 16:11–18:17) Taunimanima tausen momo be edia tomadiho koikoi oreadia idia rakatanidia, mai kudou ibounai ida Keristen dalana idia abia dae, bona Keriso Iesu bona aposetolo taudia hegeregeredia haroro gaukara idia karaia goadagoada. Unai dainai haida ese idia inai henidia bona idia dagedage henidia, tomadiho koikoi gunalaia taudia bona diba kerere idia abia politikol lohia taudia ese unai kara idia havaraia. Unai Keristen taudia edia gunalaia tauna Iesu Keriso, Maino Lohiana, be gavamani hadikaia kotana ia abia dainai idia hamasea; taunimanima ese idia samanidia, idia gwau unai maino ura henia Keristen taudia be “iseda hanua idia hadikaia noho,” ‘tanobada ibounai dekenai kerere idia havaraia,’ bona idia gwau idia be ‘gabu ibounai inai orea dekenai idia hereva ia dika’ taudia. (Kara 16:20; 17:6; 28:22) Petero ese iena revareva ginigunana ia torea neganai (62-64 C.E. bamona), ita laloa Keristen taudia edia gaukara be “Ponto, Galatia, Kapadokia, Asia bona Bitunia” dekenai idia diba momo.—1 Pet. 1:1.
This article is unique to PNG.