Sekit Hebouhebou Bona Dina Tamona Hebouhebou Matamatadia
1 Sekit Hebouhebou Ena Program: Iesu ena hereva Mataio 6:33 dekenai idia badinaia totona, Keristen momokani taudia ese edia mauri lalonai Basileia gaukara idia atoa guna hanaihanai. Unai dainai, February, 1994 ai do ia matamaia hebouhebou ena program ladana “Basileia Tahua Guna Noho” be sekit hebouhebou ena ladana namona.
2 Program ena hereva hamatamaia negana amo do idia hahedinaraia goevagoeva Basileia be momokani ia noho, ia be gaukara gavamani ta, mai ena tano, mai ena lohia taudia, mai ena taunimanima, bona mai ena taravatu. Oibe, hari inai negai, taunimanima durudia totona, taunimanima edia gavamani ese idia gaukaralaia taravatu momo be Baibel dekena amo idia abia.
3 Iseda mauri ibounai lalonai bema Basileia gaukara ita atoa guna, unai ese ita ia naria bona hahenamo do ita abia ena sivarai do ita kamonai. Ita ia durua sisiba herevadia amo do idia hahedinaraia dahaka do ita karaia ita lalo-hekwarahi momo garina. Hereva, haheitalai, bona kiki hebou karadia amo, dahaka dainai iseda matana ia namo be gau badana do idia hahedinaraia.
4 Hebouhebou ena Saturday dinanai, idia hegeregere vadaeni taudia ese taunimanima vairadiai bapatiso do idia abia, edia gwauhamata Iehova dekenai idia hahedinaraia totona. Bona Sunday dinanai, namona be ita ibounai ita lao pablik tok ita kamonai henia totona, ena ladana be “Dirava Ena Basileia ese Taunimanima Do Ia Hanamodia Dalana.”
5 Namona be ita hegaegae namonamo sekit hebouhebou ena dina rua dekenai ita lao totona. Hebouhebou ena program herevadia, bona tadikaka bona taihu be mai moale danu do ita hebamo heheni dainai, ita ibounai be heduru bona hagoadaia herevadia do ita abia; unai ita reaia be namo lasi.
6 Dina Tamona Hebouhebou Ena Program: Tau Hereadaena bukana ita stadilaia vadaeni karana ese iseda moale Iesu Keriso dekenai ia habadaia. Vadaeni, lagani 1994 ena dina tamona hebouhebou ena hereva badana, ladana “Eda Raka Dalana Hahedinaraia Tauna Badana Ita Gavaia Namonamo” be namo herea, bona ita do ia hadibaia ia murinai do ita raka ena anina be dahaka.
7 Herevana iseda mauri laganidia be hida, eiava hereva momokani ena orea lalonai ita noho daudau eiava lasi, to hebouhebou dekenai ita lao taudia iboudiai be hagoadaia hereva do ita kamonai, iseda mauri lalonai Keriso ena kara do ita habadaia totona. Program ena hereva kahana ta dekenai, memero kekeni totona sisiba herevadia do idia henia. Do ia durudia edukeisini, moale karadia, bona kohu tahua karana dekenai lalohadai maoromaoro do idia abia totona. Hereva, ekspiriens, bona haheitalai herevadia amo, do idia hahedinaraia edena bamona ita ese tanobada ena siahu ita dadaraia diba, bona Keriso ena kara ita tohotohoa diba.—1 Pet. 2:21.
8 Idia gwauhamata vadaeni taudia be taunimanima vairadiai bapatiso do idia abia, bona unai amo do idia hahedinaraia idia be Keriso murinai idia raka taudia. Bapatiso idia do abia lasi neganai, Baibel ena amo bapatiso ena hereva namona ta do idia kamonai henia. Dina tamona hebouhebou dekenai bapatiso do idia ura abia taudia ese edia kongregesen naria tauna do idia hadibaia haraga be namo, bena ia be mai ena nega dala ia hegaegaelaia elda taudia be idia danu bapatiso henanadaidia do idia karaia totona.
9 Idia boiria vadivadi tauna ta ese hereva badana do ia henia, ena ladana be “Eda Raka Dalana Hahedinaraia Tauna Ita Gavaia Dainai, Dahaka Ita Davaria?” Namona be kamonai taudia iboudiai ita boiridia mai unai heduru bona abidadama hagoadaia program ena hereva do idia kamonai henidia totona. Dala iboudiai amo, iseda Haheitalai Badana, Iesu Keriso, ena kara ita tohotohoa be dala hereadaena.—Mat. 19:27-29.
This article is unique to PNG.