Kahana 1: Hegaegae Noho Lauma Dalanai Oi Tubu Namonamo Totona
1 Aposetolo Paulo be Filipi kongregesen ia haginia bona unai taudia ia lalokau henidia bada. Tauanina dalanai mai hebogahisi ida idia durua dainai ia moale, bona ia gwau edia kara be haheitalai namona.—2 Kor. 8:1-6.
2 Paulo ese revareva Filipi taudia dekenai ia torea badina ia lalokau henidia bada. Insight buka, Volume 2, rau 631, ena hereva be inai: “Unai revareva lalonai ia ese Filipi kongregesen taudia ia hagoadadia edia kara namona idia karaia noho totona—edia lalo-parara idia habadaia bona mauri ena Hereva idia dogoatao auka totona, edia abidadama ia goada noho totona, bona do idia abia davana namona ena helaro idia laloa noho totona.” Unai hereva be mai moale danu idia abia dae, bona lalokau ese idia bona aposetolo Paulo ia hatamonaia. Hari inai negai, Paulo ena hereva be mai anina bada ita dekenai danu, bona badina namodia rua ita ia henia iena sisiba ita laloa namonamo totona, Filipi 3:15-17 ena sisiba be mai anina bada.
3 Mauri Dalana Dekenai Lo Tauna Bamona Ita Lalohadai Maoromaoro be Gau Badana: Filipi 3:15 dekenai, Paulo be lagani momo lalodiai mauri ena hekwarahi ia diba tauna ta bamona ia toretore. Filipi taudia be lauma dalanai idia tubu dainai ia hanamodia, bona lo Keristen taudia mai edia laloa maoromaoro taudia hegeregeredia ia hereva henidia. Bema Iesu bamona, edia laloa maoromaoro karana ese manau bona tanikiu karadia ia hahedinaraia, idia be ‘kerere ta lasi, bona edia lalona dekenai dika ta do ia noho lasi, Dirava ena natuna edia kara bamona . . . , bona mauri ena hereva idia dogoatao noho.’ (Fil. 2:15, 16) Paulo ena hereva ita duahia neganai, namona be ita laloa ita ia hereva henia. Ita ura momokani Iesu bamona ita laloa maoromaoro, bona mai iseda manau bona tanikiu danu iseda gaukara ita karaia. Hanaihanai guriguri amo Iehova ita noia, laloa maoromaoro kara bona kara ma haida ita karaia namonamo totona.—Fil. 4:6, 7.
4 Filipi 3:16 ena hereva hegeregerena, namona be ita ibounai be lauma dalanai ita tubu. Unai hereva “tubu” ena anina be “vaira kahana ita raka, ita goada ita lao.” Lauma dalanai idia tubu idia lao taudia be “lalohadai matamatadia, karadia, eiava daladia idia ura henidia.” Paulo ia ura Filipi taudia idia diba Keristen ena dala ia badinaia oreana ia noho kava lasi, bona Keristen ena tomadiho idia abia dae taudia be lauma dalanai idia tubu noho be gau badana. Lauma dalanai idia tubu idia lao neganai, mai edia ura danu sibodia edia kara idia tahua, sibodia edia kerere idia gwauraia, bona idia goada karaia hari idia karaia gaukarana do idia habadaia eiava idia hanamoa totona. Hari inai negai, Iehova ena tanobada oreana be vaira kahana ia heau lao, ia tubu noho unai, ena gaukara ia habadaia, bona ena diba Dirava ena Hereva dekenai ia habadaia. Ita ta ta ibounai be ia danu ita tubu noho be gau badana, ita ia henia heduru gaudia ita abia bona ena gaukara ita goadalaia.
5 Lauma Dalanai Ita Tubu Noho Totona, Ita Hegaegae Namonamo Noho be Gau Badana: Paulo ese ena tadikaka ma ia hagoadadia, ia gwau: “Guna ita abia dae dalana do ita badinaia noho be namo.” (Fil. 3:16) Ita hegaegae noho ena anina be taunimanima eiava gau haida be edia gabu korikori dekenai ita atoa diba, bona iseda kara do idia namo. Filipi dekenai, Keristen taudia be edia gabu korikori idia laloa noho, idia be Iehova bona edia tadikaka idia bamodia namonamo. Lalokau ena taravatu ese edia mauri ia biagua. (Ioa. 15:17; Fil. 2:1, 2) Paulo ese ia hagoadadia “laloa tamona bona ura tamona Sivarai Namona [idia] abidadama henia totona.” (Fil. 1:27) Hari inai negai, Keristen taudia idia hegaegae noho bona edia kara idia namo be gau badana danu.
6 Hanaihanai gaukara ta oi karaia loulou neganai unai ena anina be oi hegaegaelaia vadaeni dalana oi badinaia. Vaia unai be oiemu kara do idia gwauraia. Ita hegaegae namonamo noho karana ese ita ia durua, badina ita laloa daradara lasi, ita diba dahaka do ita karaia—dala ita abia hidi vadaeni bona vaia unai dala ita badinaia.
7 Ita hegaegae namonamo bona tiokratik dala ita badinaia noho totona, namona be iseda lalohadai bona kara idia namo, ita idia hagoadaia, ita idia durua, bona idia be Dirava ena ura hegeregerena—badina unai amo lauma dalana dekenai ita sibona ita hagoadaia, haida ita durudia diba, bona bema mai iseda dala, iseda nega Iehova ena hesiai gaukara dekenai ita habadaia diba. Unai kara iboudiai dekenai ita kwalimu totona gau badana be ita hegaegae namonamo noho, hegeregere, siboda eda stadi ita karaia, hebou ta ita reaia lasi, bona haroro gaukara ita karaia.
8 Lauma Dalanai Ita Hegaegae Namonamo Noho Totona, Dahaka be Gau Badadia: Gau badana ta be ‘laloa diari bona aonega’ ita abia. (Fil. 1:9) Siboda eda stadi ita karaia neganai, iseda abidadama ia habadaia, iseda ura hereva momokani dekenai ia hagoadaia, bona ita ia ha-uraia kara namodia do ita karaia totona. To, haida idia davaria sibodia edia stadi idia karaia loulou be ia auka. Idia momo idia gwau idia karaia lasi ena badina be edia nega be lasi dainai.
9 Dina ta ta iboudiai Baibel ita duahia ena namo be bada herea momokani. Dala idauidau amo ena hadibaia hereva ese ita idia ‘durua.’ (2 Tim. 3:16, 17) Dina ta ta iboudiai be mai edia hekwarahi dainai, edena bamona nega ita davaria diba Baibel ita stadilaia totona? Haida idia gwau bema dina ta ta iboudiai mahuta amo idia toreisi haraga, edia lalona idia diari bona miniti haida lalodiai idia stadi namonamo diba. Ma haida idia gwau hanuaboi kahanai, mahuta totona idia hekure gwauraia neganai, miniti haida lalodiai idia duahiduahi be namo. Hahine be dina ta ta iboudiai ruma dekenai idia noho, bona adorahi kahanai ruma taudia ma haida be gaukara eiava sikuli gabudia amo ruma dekenai idia do ginidae lasi neganai, reana nega sisina idia atoa diba idia stadi totona. Haida ese Baibel idia duahia mo sibona lasi, to edia ruma bese stadi lalonai Proclaimers bukana idia duahia danu.
10 Kara matamatadia ita karaia neganai, reana iseda kara gunadia ia hagagevadia. Reana guna, iseda nega namona be anina lasi karadia dekenai ita haorea kava. Unai kara ita dadaraia be ia auka. Tau ta lasi do ia gwau edena dala amo iseda stadi do ita karaia totona; bona iseda stadi karana dainai tau ta lasi ese ita ia samania diba. Bema “gau namodia” ita lalodia bada bona ita ura momokani “nega namona” ita hoia namo do ita davaria totona, vadaeni hanaihanai stadi karana do ita goadalaia noho.—Fil. 1:10; Ef. 5:16.
[Questions]
1. Dahaka dainai Paulo ese Filipi kongregesen taudia ia lalokau henidia bada?
2. (a) Dahaka dainai Paulo ese Filipi kongregesen taudia ia tore henidia? (b) Hari inai negai, dahaka dainai Paulo ena hereva ita laloa be gau badana?
3. (a) Dahaka dainai Keristen tauna do ia laloa maoromaoro be gau badana? (b) Daika ena laloa maoromaoro karana ita ura tohotohoa?
4. Ita ibounai ita goada karaia dahaka do ita karaia totona?
5. Hereva momokani dekenai ita tubu ita lao totona, dahaka ita karaia?
6. Lauma dalanai ita tubu namonamo totona, edena bamona ita hegaegae namonamo noho diba?
7. Ita hegaegae namonamo noho tiokratik dalana be dahaka?
8. Ita hegaegae namonamo noho totona, dahaka ita abia be gau badana?
9. (a) Dahaka dainai Baibel ita duahia hanaihanai be gau badana? (b) Edena negadia lalonai unai ita karaia diba?
10. (a) Iseda mauri lalonai kara matamatana ta ita karaia neganai, dahaka hekwakwanai ia vara diba? (b) Stadi karana ita karaia noho totona, dahaka ita laloa bada?
This article has been taken partly from km-E 8/94 “Keep Walking Progressively in an Orderly Routine,” par. 1-10. Part 2 is in km 9/94.