Nega Idauidau Bona Gabu Idauidau Dekenai Ita Haroro

¹ Iesu Keriso ena orea taudia, lauma helaga amo ia horodia taudia unai, bona edia bamodia, “hutuma bada herea” danu, be idia ura bada Iehova, “noho hanaihanai Pavapavana,” do idia hanamoa. (Apok. 7:9; 15:3) Baibel bona Gima Kohorona bona Keristen bukadia ma haida ita stadilaia goadagoada karana amo, Dirava ita dibaia maoromaoro; unai diba be mauri henia ranuna goevana ia lohilohi gabuna ta hegeregerena. Unai dainai, “aonega be ia lohilohi noho, ia aru goadagoada” ita dekenai. (Her. 18:4) Unai diba ese ita ia doria, ‘hanamoa herevadia ita gwauraia momo’ totona, ruma ta ruma ta dekenai ita haroro neganai, dala ai ita haroro neganai, kamonai taudia ita lou henidia neganai, bona ura taudia ita stadi henidia neganai danu. To Baibel ese haroro gaukara nega idauidau ai bona gabu idauidau ai karaia karana ia herevalaia danu.​—Sal. 119:​171.

² Baibel Ena Haheitalai Haida: Dirava ese lauma helaga amo Iesu ia horoa murinai, Iesu ese Ioane, Andrea, bona Petero danu ia boiridia ia noholaia rumana dekenai do idia lao, bena unai dina ibounai lalonai ia haroro henidia, iena haroro negana ginigunana unai. (Ioa. 1:​35-42) Iesu be dala dekenai “ia raka lao neganai” Mataio ia itaia, ia hamaoroa, “Lauegu murinai oi raka.” Vadaeni ia toreisi, Ia murinai ia raka.​—Mat. 9:9.

³ Iesu ese ‘aonega ia lohilohi bona ia aru goadagoada’ dalana ia haheitalaia namo herea. Ena be Sukara dekenai Iakobo ena ranu gurina badinai ia helai neganai, ia hitolo bona ia hesiku, to Samaria hahinena ta ia haroro henia; unai hahine be ranu utua totona ia mai. Iesu ese ia hamaoroa, ia gwau: “Lau ese do lau henia ranuna do ia inua tauna be do ia ranu mase lasi ia lao bona hanaihanai. Lau ese do lau henia ranuna be inai tau lalonai sinavai bamona do ia aru noho, bona mauri ranuna do ia henia.” Iesu ese unai hahine ia haroro henia murinai, hahine ia lao bona ma haida ia hamaorodia, bena idia momo idia hebou Iesu ena hereva kamonai totona.​—Ioa. 4:​6-42.

⁴ Haroro tauna Filipo ese kariota ta lalonai ia helai tauna ia haroro henia. Unai neganai unai tau ese Isaia ena peroveta herevana ia duahia. Ia ese Filipo ia noia kariota ai do ia gui, bena Filipo ese “Iesu ena Sivarai Namona ia hadibaia.” Hari Etiopia tauna ese Filipo ena hereva ia abia dae bena bapatiso ia abia. (Kara 8:​26-38) Aposetolo Paulo be dibura rumana ta lalonai ia noho neganai, tano ia marere bada dainai ena kwatua auri be sibona idia kokia murinai, gima tauna ia haroro henia. Bena dahaka ia vara? “Ia, mai ena ruma taudia ibounai danu nega tamona bapatiso idia abia.”​—Kara 16:​19-34.

⁵ Hari inai nega lalonai, tano haida dekenai gavamani ese taravatu idia atoa dainai, Keristen haroro gaukarana be ruma ta ruma ta dekenai idia karaia diba lasi, unai dainai dala idaudia amo sivarai namona idia harorolaia. Ena be haida ese ita idia dagedage henia, to iseda kudouna ese ita idia doria, Dirava ena Basileia ena hairai ita gwauraia totona. Stefano idia hodoa mase murinai, hahediba taudia be gabu idauidau dekenai idia lao. To, sivarai namona idia harorolaia noho, bona reana nega idauidau ai bona gabu idauidau ai edia Basileia harorolaia gaukarana idia karaia.​—Kara 8:​4-8; 11:​19-21.

⁶ Bema dibura rumana ai ita idia koua, eiava ita gorere o ita raka diba lasi dainai iseda ruma dekenai bema ita noho hanaihanai, dala idauna ta amo Dirava ena Basileia ena hairai ita gwauraia diba. Lagani rua lalodiai, sibona ena ruma lalonai Paulo idia koua bona Roma ena tuari taudia ese idia gimaia. Mai ena lalohisihisi ida ia noho kava lasi, to taunimanima ia boiridia do idia vadivadi henia, bena “vadivadi taudia ibounai ia abia dae. Dirava ena Basileia ia harorolaia, bona Lohiabada Iesu Keriso ena sivarai ia hadibaia. Ia hereva mai goada danu, bona tau ta ia koua lasi.” (Kara 28:​16-31) Unai be haheitalai namona! Bema oi be Iehova ena Witness tauna ta bona oiemu ruma bema oi rakatania diba lasi, Paulo ena kara oi tohotohoa diba, a?

⁷ Paulo idia gimaia taudia ta ta be ena nega ena nega ai ia idia gimaia, unai dainai Dirava ena Basileia ena hairai ia gwauraia negadiai, idia momo idia kamonai. Ita diba ia ese unai gima taudia ia haroro henidia danu. Ena haroro dalana idauna ese anina bada ia havaraia dainai, Paulo be inai hereva ia torea: “Inai lau dekenai idia vara gaudia ese Sivarai Namona idia koua lasi. Lasi, inai lauegu hisihisi ese Sivarai Namona ia durua bona ia hatubua noho. Badina be Kaisara ena ruma idia gimaia tuari taudia ibounai, bona iniseni idia noho taudia ibounai danu idia diba vadaeni, Keriso ena hesiai gaukara dainai lau be dibura rumai lau noho. Bona ekalesia varavara momo lau idia laloa, diburai lau noho. Vadaeni inai idia laloa noho dainai, edia lalona ese goada idia davaria. Edia gari idia laloa lasi, bona Sivarai Namona idia harorolaia noho.” (Fil. 1:​12-14) Bema dibura rumana ai ita idia koua dainai ruma ta ruma ta dekenai ita haroro diba lasi, Paulo hegeregerena Dirava ena Basileia ita harorolaia diba. Unai ese iseda tadikaka do ia hagoadadia!

⁸ Buka ta ese Keristen taudia gunadia be inai bamona ia gwauraidia: “Keristen hahediba herevadia idia abia dae taudia idia momo daekau hanaihanai. Herevana gabu ta dekenai idia lao bisinesi karaia totona eiava taunimanima ese idia dagedage henidia dainai idia heau lao gabu idauna ta dekenai, to Keriso idia harorolaia . . . Idia momo be edia gaukara idia karaia negana lalonai, idia abia dae hahediba herevadia be ma haida dekenai idia gwauraia.” (The Missionary Enterprise, Edwin Munsell Bliss ese ia torea bukana, rau 14) Oibe, Basileia harorolaia taudia gunadia be ruma ta ruma ta dekenai idia haroro bona nega idauidau ai bona gabu idauidau ai idia haroro danu.

⁹ Laloa Guna Bona Hegaegae: Iesu bona ia murinai idia raka taudia gunadia hegeregeredia, namona be ita danu be ruma ta ruma ta dekenai ita haroro, bona nega idauidau ai bona gabu idauidau ai ita haroro danu be namo. Unai ita karaia namonamo totona, gau badana be ita laloa namonamo guna bona ita hegaegae. Iesu ese taunimanima ia hedavari henidia gabudia idauidau ai bona negadia idauidau ai, ia hadibadia totona ia ese memero maragidia, aniani, dabua, manu, palaoapalaoa, guba ena toana, bona taunimanima edia gaukara danu ia herevalaia. (Mat. 4:​18, 19; 6:​25-34; 11:​16-19; 13:​3-8; 16:​1-4) Ita danu be gau idauidau momo ita herevalaia diba, Dirava ena hereva momokani gwauraia hedinarai totona.

¹⁰ Park gabuna dekenai ita helai neganai, ita badinai ia helai tauna ita haroro henia diba, eiava sitoa lalonai laini dekenai ita naria noho neganai, ita vairanai eiava murinai ia gini tauna ita haroro henia diba. Paulo be Atena dekenai ia noho neganai, “hoihoi gabuna lalonai danu, dina ibounai ia lao, unuseni ia davaria taudia dekenai ia herevahereva.” (Kara 17:17) To nega idauidau ai bona gabu idauidau ai do ita haroro totona, ita hegaegae be namo. Hegeregere, peleini eiava PMV amo gabu ta dekenai oi lao gwauraia, a? Namona be Baibel bona pepapepa, magasin, eiava buklet haida oi abia lao danu. Taunimanima vairadiai Keristen bukadia duahia karana ese edia matana ia veria bena oi hereva henidia diba.

¹¹ Namona be taunimanima oi hanamodia bona oi gado-namo henidia guna. Buka Helega Herevalaia ena Hamatamaia Herevadia itaia. Hegeregere, basi dekenai bema tau burukana ta be oi badinai ia helai, reana inai bamona do oi hereva diba: “Lauegu ladana be ——. Lau ese iseda mauri ena anina lau laloa momo. Taunimanima momo be hora momo lalodiai moni gaukara idia karaia loulou dainai, idia be nega lasi edia mauri ena anina do idia laloa. Iseda mauri laganidia idia momo neganai, ita lalo-parara mauri ena nega ia kwadogi sibona, bona ita henanadai, ita gwau: ‘Mauri ena anina be inai sibona, a?’ Dirava ese ita taunimanima ia havaraia neganai, ia be mai ena palani namona ita totona, a?” Oi naria sisina, oi hereva henia tauna do ia haere diba totona. Bena reana Dirava ena palani taunimanima totona do oi gwauraia diba bona Apokalupo 21:​3, 4 lalonai ia gwauhamatalaia gaudia do oi herevalaia diba. Nega idaudia ai bona gabu idaudia ai do oi haroro namonamo totona, kongregesen heboudia ai bona Keristen bukadia ai oi dibalaia herevadia do oi gaukaralaia diba.

This article is unique to PNG.