Oiemu Kara Toana be Dahaka?
1 Filipi kongregesen dekenai ena toretore haorea totona, Paulo be inai hagoadaia herevana ia torea: “Namona be Lohiabada Iesu Keriso ena hariharibada umui ibounai dekenai do ia noho.” (Fil. 4:23) Idia ura momokani sivarai namona idia harorolaia, bona danu mai edia lalokau ida ta ese ta ena namo ia tahua dainai ia hanamodia.—Fil. 1:3-5; 4:15, 16.
2 Namona be iseda kongregesen lalonai unai bamona kara ita hahedinaraia danu. Bema ita ibounai be mai iseda goada danu ita gaukara, ita hebogahisi, bona ita heabidae neganai, ita idia raraia taudia ese unai kara idia itaia. Hagoadaia bona lalokau karadia ese lauma dalanai lalo-tamona ia havaraia. (1 Kor. 1:10) Hagoadaia lasi karana ese lalo-manoka bona ura momokani lasi mamina ia havaraia.—Apok. 3:15, 16.
3 Elda Taudia ese Gaukara Idia Gunalaia: Elda taudia edia maduna be idia goada karaia idia huanai bona kongregesen huanai hagoadaia kara namona ia noho totona. Dahaka dainai? Badina idia edia lalohadai bona kara ese kongregesen taudia edia kara ia haidaua diba. Ita moale elda taudia ese haroro gaukara idia goadalaia neganai, mai edia kiri bona mai edia hebogahisi hereva amo ita idia hereva henia neganai, bona edia sisiba namona amo ita idia hagoadaia neganai, herevana unai be ita ta ta sibona sibona dekenai eiava platfom amo idia henia.—Heb. 13:7.
4 Momokani, namona be ita ta ta ibounai ita heduru kongregesen lalonai moale, heabidae, goada, bona lauma dalanai ita idia hagoadaia karadia ita habadaia totona. Ma haida ita bamodia neganai ita ta ta ibounai be iseda moale bona lalokau karadia ita hahedinaraia diba. (1 Kor. 16:14) Namo lasi ita huanai haida ita dadaraidia badina idia buruka, idia be bese idaudia amo, idia sikuli bada eiava maragi, eiava edia moni be bada eiava maragi dainai. (Efeso 2:21 itaia.) Ita be mai iseda helaro dainai, ita ese moale bona heabidae ita hahedinaraia badabada diba, bona hesiai gaukara ita goadalaia diba.—Roma 12:13; Kol. 3:22, 23.
5 Namona be ita idia bamoa taudia iboudiai, kamonai matamata taudia danu, be idia diba idia ita abidia dae bona namona be iseda tadikaka ibounai oreana ena lalokau bona abidadama kara ena mamina idia abia. Iseda hesiai gaukara amo bona iseda Keristen karadia amo ita hahedinaraia kongregesen be “hereva momokani ena du bona iena badina korikori.” (1 Tim. 3:15) Danu, lauma dalanai ita noho namo badina “Dirava ena maino” ita abia, unai ese iseda kudouna ia mamia gaudia bona ita laloa gaudia ia naria namonamo. (Fil. 4:6, 7) Namona be ita ibounai ita goada karaia kara namo do ita hahedinaraia totona, bena Lohiabada Iesu Keriso dekena amo Iehova ena hebogahisi do ita davaria diba.—2 Tim. 4:22.