Haroro Sikuli Ena Henanadai Dainai Hegaegae
1 Haroro Sikuli ena kahana idauna ta be Haroro Sikuli ena henanadai. Lagani ta ta ai, inai riviu be nega toi ita karaia—April, August, bona December edia dokona ai. Lagani gunadia ai, riviu pepana idia printaia neganai pepa dekenai kahana ta ia noho bona haere ita torea diba. To hari, ita be pepa idauna ta dekenai henanadai edia haere ita torea. Ma danu, henanadai pepadia be ita abia guna, Haroro Sikuli ena henanadai dinana ia do mai lasi neganai.
2 Harihari amo, henanadai pepadia do idia atoa April, August, bona December ena Iseda Basileia Gaukara pepana dekenai; unai hua lalodiai Haroro Sikuli ena henanadai do idia karaia. Anina be wiki toi o hani unai henanadai karaia dinana vairanai, stiuden be henanadai pepadia do idia abia. Namona be tadikaka ese inai pepa be edia Iseda Basileia Gaukara pepana danu nega tamona idia abia. Sikuli naria tauna ese ia dogodia tao lasi ela bona Haroro Sikuli ena henanadai purana be gau badana. Namona be ta ta ese ena henanadai pepana ia naria bona Haroro Sikuli ena henanadai hebouna dekenai idia mailaia.
3 Inai pepa idia abia haraga dainai, idia ta ta be buka idauidau lalonai haere tahua karana amo do idia hegaegae diba. Idia hegaegae namonamo neganai, idia ta ta edia hekwarahi ena bada hegeregerena, hahenamo do idia davaria. Oi hegaegae noho neganai, henanadai pepana dekenai oi toretore lasi, badina Haroro Sikuli ena henanadai negana ai do oi gaukaralaia. Laloaboio lasi, Haroro Sikuli ena henanadai oi karaia noho neganai, Baibel sibona oi itaia diba. Unai neganai, ma buka haida bona oi torea vadaeni herevadia oi gaukaralaia diba lasi.
4 Haroro Sikuli ena henanadai negana ai, bema henanadai oi haerelaia oi sibona emu hereva amo, namona be ma pepa idauna ta dekenai emu haere oi torea. To, bema henanadai edia haere be “momokani” eiava “koikoi” sibona, eiava haere maorona henunai oi torea diba, henanadai pepana dekenai oi torea diba. Haere maorodia momokani bona kwadogidia oi henia toho. Guna oi hegaegae namonamo dainai, inai oi karaia be do ia auka lasi. Sikuli naria tauna ese haere ia henidia neganai, stiuden ta ta be sibona ena pepa ia makaia diba.
This article is unique to PNG.