Mai Anina Bada Karana Taunimanima Edia Sivarai Lalonai
1 Ena Tamana ena hereva hegeregerena, Iesu ia mai tanobada dekenai hereva momokani ia hahedinaraia totona. Unai amo ita ese mauri hanaihanai ita abia diba. (Ioa. 18:37) Ia abidadama noho ela bona ia mase karana ese Iehova ia hanamoa, ena ladana ia hahelagaia, bona kara dika ena davana ia henia. (Ioa. 17:4, 6) Unai dainai, taunimanima edia sivarai ibounai lalonai, Iesu ena mase be mai anina bada.
2 Dirava ese Adamu ia karaia negana amo, tanobada dekenai goevadae tatau rua sibona idia noho. Adamu be mai ena dala ia do havaraia lasi natudia dekenai hahenamo namodia ia henia. To ia karaia lasi. Mai mataganigani ida ia gwau-edeede dainai, ena natudia edia mauri ia dika ela bona idia mase. Iesu ia mai neganai, ia ese Dirava ia badinaia bona ia kamonai henia goevagoeva dainai, dala ia kehoa abidadama taudia ese mauri hanaihanai idia abia totona.—Ioa. 3:16; Roma 5:12.
3 Ma kara ta be Iesu ena mase bona boubou karana danu ia hegeregere lasi. Unai kara ese taunimanima edia sivarai ia haidaua. Dala ia kehoa mase taudia bilioni momo idia toreisi lou totona. Noho hanaihanai Basileiana ena badina ia haginia, ia ese kara dika do ia haorea, bona tanobada be paradaiso ai do ia halaoa. Lalohisihisi bona kara dika idauidau amo taunimanima do ia ruhadia.—Sal. 37:11; Kara 24:15; Roma 8:21, 22.
4 Unai dainai ita lalo-parara dahaka dainai Iesu ese ena hahediba taudia ia hamaorodia ena mase do idia laloatao lagani ta ta ibounai Memorial karana amo. (Luka 22:19) Ena anina ita abia dae neganai, mai moale ida ita ura tanobada hegegemadai Iehova ena Witness taudia edia kongregesen ibounai ida Friday, April 14 ai, dina ia diho murinai do ita hebou. Unai nega ia do mai lasi neganai, namona be iseda ruma bese ida Baibel lalonai Iesu ena mauri tanobada dekenai ena dina ginigabedia bona hereva momokani dainai ia gini goada sivaraidia ita duahia. (Ai abia hidi siridia be 1995 Calendar, April 9-14 ai.) Iseda Havaraia Tauna ita badinaia karana dekenai haheitalai namona ia hahedinaraia. (1 Pet. 2:21) Ita goada karaia iseda turadia, varavara bona Baibel stadi taudia, bona hereva idia kamonai taudia ita boiridia mai inai mai anina bada hebouna dekenai. Hebou dekenai dahaka do ia vara bona paraoa bona uaina edia anina oi gwauraia hedinaraia guna.—1 Kor. 11:23-26.
5 Kingdom Hall toana ia namo bona goeva totona, elda taudia ese unai idia hegaegaelaia guna be namo. Paraoa bona uaina do ia abia hegaegae tauna ta danu do idia abia hidi. Bona paraoa bona uaina henia dalana namona hegaegaelaia. Lohiabada ena Anibou dekenai hemataurai ita hahedinaraia daladia haida be Iseda Basileia Gaukara pepa, March 1993, rau 6 lalonai idia torea. Dina haida Memorial vairanai, bona Memorial murinai danu, kongregesen ese haroro gaukara habadaia daladia ia hegaegaelaia be namo.
6 Vanegai lagani lalonai, tanobada hegegemadai ai unai anina bada hebouna dekenai taunimanima 12,288,917 idia mai. Unai hebou be mai anina bada iseda kalenda dekenai dainai, namona be ita ibounai ita lao.