Iehova ese Ita Ia Tahua—Dahaka Dainai Ia Namo?
1 Taunimanima ibounai idia ura edia tauanina ia goada. Unai amo edia mauri idia moalelaia diba. To, idia goada taudia momo be nega ta ta ai doketa ese ia sekedia. Dahaka dainai? Idia ura idia diba gorere ta ia noho eiava, bena unai amo hanamoa muramuradia idia abia diba. Iseda goada lauma dalanai ita naria namonamo be mai anina bada. Iseda ‘abidadama ia goada’ neganai, Iehova ese ita do ia lalo-namo henia.—Tito 1:13.
2 Hari inai nega be nega namona Iehova ese iseda lalona ia tahua totona. Dahaka dainai hari be nega namona? Badina Iehova be iena dubu helagana lalonai, bona ia ese taunimanima ibounai edia kudouna ia tahua noho. (Sal. 11:4, 5; Aon. 17:3) Davida bamona, Iehova ita noia ita ia tahua goevagoeva totona: “Lohiabada e, lau do oi tahua bona tohoa, bona egu kara do oi itaia. Egu ura bona egu laloa danu do oi tahua.”—Sal. 26:2.
3 Ita be mai eda kara dika dainai, namona be ita naria namonamo iseda lalohadai ta ese iseda goada lauma dalanai ia hadikaia garina. Aonega Herevadia 4:23 ia gwau: “To, gau badana momokani, oiemu kudouna, oiemu laloa ia havaraia gauna, do oi naria namonamo, badina be oiemu laloa dekena amo, oiemu mauri be ia heau noho.”
4 Iseda goada lauma dalanai be inai tanobada ena kara gageva bona kara bodaga ese ia hadikaia diba danu. Bema ita ese inai tanobada dikana ita bamoa, iena lalohadai dalana bona ena kara do ita karaia. Eiava inai tanobada ena mauri dalana ta ita abia dae bena tanobada ena lalohadai ese ita do ia guia.—Ef. 2:2, 3.
5 Satani, ese dagedage eiava inai henia karana do ia gaukaralaia iseda goada lauma dalanai ia hadikaia totona. To nega momo, ia ese tanobada ena kohu bona moale karadia ia gaukaralaia ita ia veria totona. Petero ese ita ia hamaoroa, ‘ita laloa maoromaoro bona naria namonamo’ totona, badina “Satani be laiona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.” Petero ese ita ia hagoadaia ‘iseda abidadama dekenai do ita gini goada, vadaeni ita ese Satani do ita koua.’—1 Pet. 5:8, 9.
6 Iseda lauma dalana ita naria namonamo be mai anina bada, dina ta ta ibounai iseda abidadama ita hagoadaia noho be namo. Aposetolo Paulo ia gwau namona be iseda abidadama ita tahua noho. Doketa namona ena sisiba ita badinaia hegeregerena, namona be Iehova ita kamonai henia bena lauma dalanai ita ia tahua karana amo kerere gauna ta ia hahedinaraia bona do ita hamaoromaoroa be namo. Unai dala amo do ita “namo momokani.”—2 Kor. 13:5, 11.
7 Iehova be momokani Tahua Tauna hereana. Ia davaria gaudia be maoromaoro. Ia diba momokani dahaka ese ita do ia durua. Iena Hereva bona iena ‘hesiai tauna mai ena kamonai’ amo ia ese lauma aniani namona ia henia. (Mat. 24:45; 1 Tim. 4:6) Hanaihanai, ruma dekenai bona kongregesen hebou amo unai lauma aniani namodia ita abia neganai ita do idia durua lauma dalanai ita goada noho totona. Haroro gaukara bona Keristani gaukara idauidau lalonai ita gaukara hanaihanai ese ita do ia durua danu. Unai dainai, Iehova ese hanaihanai ita ia tahua karana ita moalelaia, ita diba ia ese ita do ia naria namo herea lauma dalana ai.