Hanaihanai Hebou Lao Henia—Ita Gini Goada Totona
1 Paulo ese ita ia hagoadaia “hereva momokani ita abidadama henia” noho. (Tito 1:9, 13) Kongregesen heboudia dekenai lalohadai namodia ita laloa bona ita idia hadibaia lauma tuari dabua ita kwatua bena “Satani ena koikoi karadia do” ita koua.—Ef. 6:11; Fil. 4:8.
2 Hebou ese Goada Idia Henia: Ita gini goada totona, hanaihanai hebou lao henia karana be gau badana. (1 Kor. 16:13) Hebou dekenai guriguri idia karaia; Dirava idia tanikiu henia, Ia idia hanamoa, bona kongregesen totona idia noinoi. (Fil. 4:6, 7) Basileia anedia ita abia hebou neganai, ita ia hagoadaia bona iseda hemami, Iehova ita tomadiho henia neganai, ita hahedinaraia. (Ef. 5:19, 20) Kingdom Hall dekenai, hebou ia do hamatamaia lasi neganai bona murinai, hebamo heheni karana ese ita ia hagoadaia bona iseda lalona ia hanamoa.—1 Tes. 5:11.
3 April lalonai hereva badana ta, “Tomadiho Koikoi Ena Dokona be Kahirakahira,” ese hereva momokani idia lalokau henia taudia ia hamaoroa namona be Babulonia Badana idia rakatania haraga. (Apok. 18:4) June bona July ai, Gima Kohorona ta ena hagoadaia herevadia toi, kara maoromaoro taudia edia dala ena diari be ia bada ia lao noho ita stadilaia! (Aon. 4:18) Oi laloa, bema unai hebou ita readia, lauma gaudia momo ita reaia unai.
4 Hesiai Gaukara Karaia Totona Ita Hegaegae bukana rau 73 ai, ia hahedinaraia iseda Haroro Sikuli be kongregesen taudia ibounai hadibaia sikulina. Namo lasi inai edukeisini namona ita reaia.
5 Iseda Hesiai Hebou ese ita ia durua iseda haroro gaukara karaia dalana ita hanamoa totona. Haheitalai ta be, Basileia Sivarai Namba 34 pepana hariharilaia dalana be hebou ta dekenai ita idia hadibaia. Tanobada hegegemadai ai, Iehova ena hahenamo bada unai gaukara dekenai ita itaia badina anina namona ia havaraia. (2 Korinto 9:6, 7 itaia.) Hanaihanai hebou dekenai idia lao taudia ese goada bona heduru idia abia dainai, pepapepa hariharilaia gaukarana idia karaia goadagoada diba.
6 Kongregesen Buka Stadi dekenai, Apokalupo Hagugurua Negana bukana ita stadilaia neganai, Dirava ena hereva ita dibaia noho bona unai ese iseda hesiai gaukara karaia goadagoada urana ia habadaia. Hari gau momo idia vara haraga dainai, namona be Apokalupo ena peroveta hereva dobudia edia anina ita lalo-pararalaia.
7 Hebou Lao Henia Karana Atoa Guna: Ena be tano momo dekenai, iseda tadikaka ese hetoho idia haheaukalaia noho, to idia diba wiki ta ta ai idia hebou be gau badana. Haheitalai be, Burundi, Rwanda, Liberia, bona Bosnia bona Herzegovina dekenai, matamata taudia momo herea idia lao hebou dekenai dainai, pablisa edia namba idia hanaia nega rua o toi amo. Iehova be inai hebou lao henia karana amo tadikaka ia durudia idia lalo-tamona noho totona.—Fil. 1:27; Heb. 10:23-25.
8 Bema umui haida be guna hebou momo umui reaia, namona be hari unai bamona kara umui hanamoa. (Had. 4:9-12) Ita gini goada diba totona, hanaihanai hebou dekenai ita lao bona unuseniai lo taudia ida ita herevahereva.—Roma 1:11.