Hegaegae Karana—Kwalimu Ena Ki
1 Haroro gaukara totona oi hegaegae neganai, do oi daradara lasi, to do oi ura oi lao haroro. Ruma tauna ena iduara dekenai oi lao neganai, oi diba dahaka do oi kikilaia. Ia ese oi do ia nanadaia garina do oi gari lasi. Bena emu ruma dekenai oi giroa lao neganai, do oi diba emu haroro gaukara dekenai gaukara namona oi karaia, bona unai lalohadai ese oi do ia hagoadaia. Oibe, hegaegae namonamo karana be iseda haroro bona iseda hadibaia dalana hanamodia dalana ena ki.
2 Paulo ia hahedinaraia hegaegae karana be mai anina bada, badina ita ia hagoadaia iseda ‘aena dekenai maino ena Sivarai Namona do ita atoa.’ (Ef. 6:15) Unai ena anina be iseda lalona, bona iseda kudouna ita hegaegaelaia, bona danu, namona be iseda lalohadai ia maoro bona iseda ura ita hahedinaraia. Ma haida ida hereva momokani kikilaia totona ita hegaegae neganai, iseda gaukara ese Basileia ena huahua do ia havaraia, bona ita do ia hamoalea.—Kara 20:35.
3 Haroro Gaukara Hegaegaelaia Dalana: Namona be ita dekenai ia auka lasi kiki herevana ita abia hidi, reana Buka Helaga Herevalaia bukana amo eiava Iseda Basileia Gaukara pepana ena rau ginigabena ai idia noho herevadia amo. Do oi gaukaralaia Baibel sirina oi laloa namonamo guna, edena hereva do oi gwauraia goada emu hereva badana hahedinaraia totona oi abia hidi. Hereva ibounai oi laloatao be herevana; to, namona be lalohadai badana oi diba, emu hereva amo oi hahedinaraia diba, bona kamonai tauna do ia ura henia dalana ai oi karaia.
4 Do oi hariharilaia buka o magasin oi duahia, bona edena gaudia oi ura oi herevalaia oi abia hidi. Emui teritori dekenai idia noho taudia idia ura kamonai gauna ta oi abia hidi. Namona be ruma taudia idauidau dekenai emu hereva do oi haidaua dalana oi laloa—tau, hahine, buruka tauna, eiava memero o kekeni.
5 Nega haida hamatamaia herevadia umui karaia toho, a? Namona be emu ruma bese eiava pablisa ma haida ida umui hebou bona hamatamaia hereva namodia umui abia hidi bona karaia toho, bena do oi diba momokani dahaka do oi gwauraia. Ruma ta ruma ta dekenai oi karaia hegeregerena oi karaia, bona ruma taudia edia ura lasi herevadia oi hanaia toho. Unai ese emu herevahereva dalana ena namo do ia habadaia bona oi do ia hagoadaia.
6 Emu hamatamaia herevana oi hegaegaelaia bona karaia loulou sibona lasi, to namona be sibona oi nanadaia, ‘Egu dabua do idia hegeregere haroro gaukara totona? Egu baege lalonai gau ibounai idia noho vadaeni, do lau hariharilaia magasin o buka danu? Edia toana ia namo, a? Egu Buka Helaga Herevalaia bukana, pepapepa, ruma-ta-ruma-ta rekodi pepadia, bona pensolo idia noho, a? Mai aonega ida iseda haroro gaukara totona ita hegaegae neganai, unai dina dekenai anina namona ia havaraia gaukarana do ita karaia.
7 Unai gaudia ita hegaegaelaia namonamo murinai, namona be Iehova dekenai ita guriguri, ena lauma ia siaia ita kwalimu totona. (1 Ioa. 5:14, 15) Hegaegae namonamo karana ese ita do ia durua iseda gaukara ‘ibounai do ita karaia namonamo’ totona, bona unai amo moale bada herea do ita davaria.—2 Tim. 4:5.