Iseda Kohu Ita Gaukaralaia Namonamo Dalana
1 Iseda mauri be Iehova dekenai ita gwauhamatalaia neganai, anina be ita gwau iseda gau ibounai, iseda kohu ibounai, be ia ena. Unai dainai iseda gau be edena bamona ita gaukaralaia be maoro? Kongregesen lalonai Keristani hesiai gaukara ia herevalaia neganai, Tadikaka C. T. Russell ia gwau: “Namona be ta ta ibounai be sibona ia laloa Lohiabada ia abia hidi hesiai tauna bamona, sibona ena nega, siahu, moni, bona gau ma haida ia naria totona, bona namona be ta ta ibounai ese dala ia tahua ena goada hegeregerena unai gaudia ia gaukaralaia, Biaguna idia hahairaia totona.”
2 Reana haida idia laloa idia be ogogami taudia bona unai dainai idia ura lasi kontribusen idia henia. To, namona be ita laloatao inai gaukara be ibounai edia henia gaudia idia haboua dainai ia heau. Haida be moni bada idia henia diba, bona unai ese haroro gaukara ia durua bada. Ma haida be moni sisina idia henia diba. To namo lasi moni sisina idia henia taudia idia hemarai bona idia laloa idia henia gauna be anina lasi. Iehova be unai bamona ia laloa lasi. Iesu ese unai ia haheitalaia goevagoeva, ia hahedinaraia vabu ia henia moni maragina dainai Iehova ia moale.—Luka 21:2-4 itaia.
3 Unai vabu ia ogogami to ia laloa lasi iena harihari gauna be anina lasi. Ia ese ma haida idia henia gaudia ia laloa lasi. Ia sibona ia henia diba gauna ia henia. Unai dala ai ia hamomokania ia be “hesiai tauna” namona. Bona ia henia harihari gauna maragina be mai anina bada. Ia ese unai nega totona Iehova ia gwauraia gaukara dalana ia durua bona Iehova ese unai ia laloa bada.
4 Unai ita karaia totona ita ta ta be tahua gauna ita atoa vadaeni, a? Paulo ese tadikaka ia hagoadadia hanaihanai henia karana ena dala ta idia badinaia. Ia gwau: “Pura ena dina ginigunana ibounai umui ta ta ese emui ruma ta ta dekenai moni do umui haboua noho, ena bada be emui gaukara davana ena bada hegeregerena.” (1 Kor. 16:1, 2) Unai be haheitalai namona ita bona iseda natudia eda henia karana lalonai ita laloa totona.
5 Nega namona ai reana oiemu Baibel stiuden tauna ida kontribusen do oi herevalaia. Reana oi hamaoroa Iehova ena Witness taudia be mai edia moale ida edia nega idia henia bona edia kohu idia gaukaralaia, davana lasi Baibel stadi idia karaia totona. To edia orea idia durua gaukarana, hegeregere edia gabu ena Kingdom Hall idia hanamoa gaukarana be mai edia davana.
6 Korinto Iharuana 9:7 bona Luka 21:1-4 ai idia noho hakaua herevadia be stiuden ida oi herevalaia, bona oi hahedinaraia iseda henia karana ena badina be lalokau. Keristani henia karana be hahenamo badana, ia ese dala ia kehoa iseda lalokau Iehova bona iseda tadikaka dekenai ita hahedinaraia totona. Lauma dalanai idia goada idia lao Baibel stiuden taudia ese unai gaudia do idia laloa bada.
7 Elda taudia idia itaia kongregesen edia kontribusen mauadia idia hedinarai goevagoeva, Kingdom Hall ena kahana namodia dekenai.—Henanadai Mauana itaia.
8 Kongregesen momo lalonai edia lalona idia hadaia hanaihanai hua ta ta ibounai kongregesen ena moni akaun amo heduru moni do idia siaia Society dekenai. Unai kara ai hanamoa bona ai laloa bada. Hari, Papua New Guinea dekenai iseda gaukara durua monina kahirakahira ibounai be tano idauidau ai idia noho tadikaka, moni bada bona ogogami tadikakadia, edia harihari gaudia amo idia siaia. Bema unai gauna be mai eda guriguri ida ita laloa, bona bema ita hegaegae namonamo, reana iseda maduna ita huaia kahana ita habadaia diba.—Gal. 6:5.
9 Iseda moni ena bada be herevana, Iehova ia hamoalea dalanai ita henia diba. Ia ese ita dekenai ia henia gaudia be momo herea, bona ia dekenai ita henia gaudia be sisina sibona. Unai dainai ia maoro bema iseda tanikiu ena toana be dala idauidau ibounai ai ita karaia diba gaudia ibounai do ita karaia! “Egu boubou gauna Lohiabada dekenai, be egu tanikiu ia dekenai, bona iena ladana dekenai do lau guriguri.”—Sal. 116:17.
This article is unique to PNG.