Henanadai Mauana

◼ Hua ta ta ibounai iseda haroro ripoti ita henia haraga ena badina be dahaka?

Basileia ena sivarai harorolaia gaukarana amo ia vara anina namona ita kamonai neganai, ita ibounai ita moale bada. (Aonega Herevadia 25:25 itaia.) Kara 2:​41 ia gwau, Pentekoste ai Petero ena hereva namona murinai, “taunimanima 3000 bamona be edia orea lalonai idia vareai.” Nega sisina murinai, unai namba ia bada daekau ela bona idia “be 5000 bamona.” (Kara 4:4) Keristani ginigunadia ese unai sivarai idia moalelaia bada! Hari inai negai ripoti namodia dainai iseda mamina be edia mamina hegeregerena. Tanobada hegegemadai iseda tadikaka be sivarai namona harorolaia gaukarana lalonai idia kwalimu ita kamonai neganai, ita moale bada herea.

Unai ripoti haboua gaukarana dekenai nega bada idia atoa bona idia hekwarahi bada dainai, namona be Basileia pablisa taudia iboudiai be unai gaukara idia durua. Hua ta ta ibounai oiemu ripoti oi henia haraga, a?

Pablisa taudia edia namba ia bada daekau ena ripoti dainai ita moale bada. Ma danu, ripoti ese Society idia durua tanobada hegegemadai gaukara ena heau dalana idia itaia totona. Do idia itaia edeseniai heduru do idia siaia be namo eiava edena bamona buka bona magasin bona hida do idia karaia. Kongregesen ta ta edia elda taudia ese ripoti idia gaukaralaia, edena kahana do idia hanamoa idia itaia totona. Ripoti namodia ese ita idia hagoadaia, sibona eda hesiai gaukara ita tahua bona ita hanamoa totona.

Namona be pablisa iboudiai do idia abia dae hua ta ta ibounai haroro ripoti do idia henia haraga be idia ta ta edia maduna. Kongregesen Buka Stadi naria taudia ese unai maduna pablisa taudia dekenai idia hadibaia lou diba, badina idia ese hua ta ta lalonai idia haroro be auka pablisa taudia ta ta do idia durua danu. Reana hua ta ta ena buka stadi ginigabena ai eiava nega namona ma ta ai unai hadibaia herevana do idia henia diba. Bema Kingdom Hall ai haroro ripoti idia henia diba lasi, Kongregesen Buka Stadi naria tauna ese idia ia haboua diba bona seketere dekenai do ia henia Society dekenai idia siaia hua ta ta edia ripoti lalonai ia atoa totona.

Nega ibounai mai eda ura ida iseda haroro gaukarana ita ripotilaia haraga ese iseda lauma maurina idia naria taudia edia maduna ia durua.