Mai Anina Bada Gaudia Atoa Guna
1 Lauma dalanai ita goada noho totona, mai anina bada gaudia haida be dahaka? Idia be sibona eda stadi, hebou lao henia karana, guriguri loulou, hebamo namona, bona Keristani haroro gaukarana. Lauma dalanai do ita goada noho lasi bema unai mai anina bada gaudia be iseda mauri lalonai ita atoa guna lasi.
2 To, ita ibounai be tauanina ena ura ita tuari henia noho bona matakani ita abia be namo. (Gal. 5:17) Namo lasi ita laloa moale bada do ita davaria bema sibona eda ura ita tahua. (Ier. 17:9) Unai dainai, bema ita ura iseda kudouna ita naria namonamo bona do ita raka kerere lasi, nega ibounai sibona eda kara ita tahua be gau badana.—Aon. 4:23; 2 Kor. 13:5.
3 Emu Kudouna Oi Tahua Namonamo: Unai oi karaia diba bema sibona dekenai inai bamona henanadai oi henia: Lau ura dikadika Dirava ena Hereva lau duahia? (1 Pet. 2:2) Kongregesen hebou ibounai lao henia ena namo lau laloa bada? (Heb. 10:24, 25) Guriguri lau goadalaia nega ibounai? (Roma 12:12) Lauma gaudia idia laloa bada taudia edia hebamo lau tahua? (Roma 1:11, 12) Sivarai namona harorolaia gaukara be sibona egu maduna bamona lau laloa? (1 Kor. 9:16) Haere maorodia ese do idia hahedinaraia oi ura mai anina bada gaudia oi atoa guna.
4 Dina Ta Ta Ibounai Oi Karaia Gaudia Oi Tahua Namonamo: Emu kudouna ena ura gaudia oi tahua neganai, namona be emu nega gaukaralaia namonamo dalana oi laloa. Nega oi atoa Baibel duahia loulou bona Gima Kohorona bona Awake! magasin ta ta iboudiai duahia totona, bona hebou hegaegaelaia totona danu. Nega oi atoa danu ruma bese idia stadi bona guriguri hebou totona. Namona be haida idia naria namonamo, nega haida sibona idia atoa TV raraia eiava kompiuta gaukaralaia totona. Namona be emu lalona oi hadaia kongregesen hebou iboudiai do oi lao henia, bona emu sediual dekenai oi atoa guna, ma gau haida oi atoa murinai. Pura ta ta ai ruma bese ibounai do idia haroro palanina oi hegaegaelaia danu.
5 Ita diba momokani, bema mai anina bada gaudia ita atoa guna iseda mauri lalonai, moale bada do ia havaraia.