‘Iehova be Lauegu Durua Tauna’
1 Iesu ese ena hahediba taudia ginigunadia dekenai gaukara ia henia neganai, ia hamaorodia: “Lau ese lau siaia umui, mamoe, uda sisia edia huanai bamona.” (Mat. 10:16) Unai hereva ese idia ia hagaria bona haroro gaukara idia hadokoa, a? Lasi. Idia be aposetolo Paulo ese gabeai Keristani tadikaka dekenai ia gwauraia hedinarai laloa dalana idia abia dae, idia ia hamaoroa: ‘Mai goada danu, inai bamona do ita hereva, “Iehova be lauegu durua Tauna, lau be lau gari diba lasi. Taunimanima edena bamona lau do idia hadikaia diba.” ’ (Heb. 13:6) Idia moale badina be Dirava ese idia ia abia hidi vadaeni Iesu ena ladana dainai hisihisi idia abia, bona idia ese hadibaia bona sivarai namona harorolaia gaukarana idia hadokoa lasi.—Kara 5:41, 42.
2 Hari tanobada hegegemadai lalonai haroro gaukarana be ena dokona kahana ai ia noho. Iesu ese ia perovetalaia hegeregerena, tanobada besedia ibounai ese ita do idia inai henia. (Mat. 24:9) Iseda haroro gaukara be idia koua toho bona idia kirikirilaia, bona tanobada ena kahana haida dekenai, unai gaukara idia taravatua. Bema abidadama dekenai ita dabu, reana ita idia hagaria diba. To, ita diba Iehova be iseda Durua Tauna, bona unai ese iseda lalona ia hanamoa bona ita ia hagoadaia ita haheauka totona.
3 Gari lasi karana ena anina be ta ia goada, ia boga-auka. Ia be gari, hemarai, bona goada lasi karadia amo ia idau. Iesu ena hahediba taudia be nega ibounai gari lasi karana idia hahedinaraia idia haheauka totona. Unai ita hahedinaraia be gau badana, Dirava ia inai henia tanobadana ena lalohadai bona kara idauidau ese ita idia hamanokaia garina. Tanobada ia halusia vadaeni tauna, Iesu, ena haheitalai namo hereana ita laloa neganai, unai ese ita ia hagoadaia! (Ioa. 16:33) Hahetoho idia davaria aposetolo taudia ese mai gari lasi ida idia gwauraia herevana ita laloatao: “Dirava ai kamonai henia be namo, taunimanima ai kamonai henia be dika.”—Kara 5:29.
4 Iseda Gaukara Ita Rakatania Lasi: Namona be ita hekwarahi iseda gaukara be mai eda lalo-namo ida ita laloa totona. (Heb. 10:39) Namona be nega ibounai ita laloatao, Iehova be iena lalokau bona hebogahisi taunimanima ibounai dekenai dainai ita ia siaia. Ia ese iena hesiai taudia ia hamaoroa lasi, anina lasi gaukara ta idia karaia totona. Ita abia gaukara ibounai be Dirava idia lalokau henia taudia edia namo totona.—Roma 8:28.
5 Lalohadai namona ese ita do ia durua mamoe bamona taudia iseda teritori lalonai ita tahua noho totona. Reana ita laloa taunimanima ese hesiku toana idia hahedinaraia badina idia lalohisihisi bona idia laloa helaro be lasi. Namona be iseda lalokau ese ita ia doria hebogahisi bona haheauka ita hahedinaraia totona. To nega ibounai buka eiava magasin ita hariharilaia eiava ta ia kamonai namonamo neganai, namona be iseda ura gauna be karaharaga lou henia do ita karaia bona edia ura do ita habadaia. Namo lasi ita be Baibel stadi do ita hamatamaia diba eiava do ita karaia namonamo diba ita daradaralaia. To, namona be hanaihanai ita guriguri Iehova ena heduru bona hakaua dalana ita abia totona, ita diba ita do ia durua.
6 Ita diba momokani Iehova ese inai gaukara namona do ia naria ela bona ia ore. (Filipi 1:6 itaia.) Iseda abidadama iseda Durua Tauna dekenai ese ita do ia hagoadaia, unai amo ‘kara namodia do ita karaia noho, do ita hesiku lasi.’—Gal. 6:9.