Natudia e—Umui be Aiemai Moale Ena Badina!
1 Memero bona kekeni matamata e, umui be Iehova ena hahegani, kongregesen ena gaukara lalodiai do umui vareai haheganina, umui diba, a? (Deut. 31:12; Sal. 127:3) Umui be ai danu Iehova ita tomadiho henia be moale gauna ta! Umui be mai regerege lasi hebou dekenai umui helai bona umui kamonai namonamo neganai, aiemai kudouna umui hamoalea. Sibona emui hereva amo umui haere toho neganai, unai ese ai ia hamoalea bada. Tiokratik Haroro Sikuli dekenai hereva umui henia neganai, haroro gaukara dekenai mai lalo-goada ida ai umui bamoa neganai, bona ai kamonai umui be mai gari lasi ida emui sikuli turadia bona tisa taudia umui haroro henidia neganai, kongregesen ibounai be ia moale bada.—Sal. 148:12, 13.
2 Ai ura umui diba emui hemataurai herevadia bona karadia, emui toana namona, emui kara goevadia, bona emui hemataurai karana taunimanima badadia dekenai ai itaia neganai, ai moale bada. To sibona emui tiokratik tahua gaudia amo umui hedinaraia ‘umui ia karaia Dirava umui laloa’ neganai, aiemai moale be ia bada herea.—Had. 12:1; Sal. 110:3.
3 Emui Tahua Gaudia Ai Dekenai Umui Hamaoroa: Ena mauri lagani be 8 merona ta be distrik naria tauna ia hamaoroa, ia gwau: ‘Gau ginigunana be lau ura bapatiso lau abia, bena lau ura kongregesen lalonai heduru lau henia saun bona maikrofon gaukara dekenai, atendan gaukara lau karaia, buka bona magasin naria gaukara lau karaia, buka stadi bona Gima Kohorona stadi dekenai lau duahiduahi. Bena lau ura hesiai tauna bona elda tauna ai lau lao. Danu, lau ura painia tauna ai lau lao bona painia sikuli dekenai lau lao. Bena lau ura Betele dekenai lau lao, sekit naria tauna eiava distrik naria tauna ai lau lao.’ Ia hahedinaraia Dirava ia hesiai henia ena hahenamo ia laloa bada!
4 Tauanina dalanai bona lauma dalanai umui goada umui lao neganai, ai moale badina emui tahua gaudia umui davaria. (Luka 2:52 itaia.) Lagani ta ta iboudiai, umui tausen momo be bapatiso lasi pablisa taudia ai umui lao bena umui hegeregere bapatiso umui abia bona Iehova ena gwauhamata hesiai taudia ai umui lao. Bena umui be heduru painia eiava ful-taim hesiai gaukara umui karaia neganai, aiemai moale be ia bada ia lao. Momokani, natudia e, umui be aiemai moale ena badina bona aiemai guba Tamana do ai hanamoa ena badina namona ta. Mani Iehova ese umui ia hanamoa bada!—Aon. 23:24, 25.