Henanadai Mauana
◼ Dahaka dainai namona be ita ese eda dabua bona tauanina ena toana ita naria namonamo Society ena ruma idauidau Brooklyn, Patterson, bona Wallkill, New York dekenai, bona tanobada hegegemadai dekenai idia noho brens opesi ita vadivadi henia neganai?
Namona be nega ibounai Keristani taudia ese kara bona toana namona idia hahedinaraia be namo. Namona be nega ibounai iseda dabua bona tauanina ena toana be idia namo bona hemataurai toana idia hahedinaraia, Iehova Dirava ena hesiai taudia edia toana korikori unai. Unai ita hahedinaraia Society ena ruma idauidau New York dekenai bona brens opesi tanobada hegegemadai ita vadivadi henia neganai.
Lagani 1998 lalonai, distrik bona intenesenel hebouhebou do idia karaia. Iseda tadikaka tausen momo herea tano momo amo ese Society ena hedikwota New York dekenai bona tano haida dekenai idia noho brens opesi do idia vadivadi henidia. Unai ruma idauidau ita vadivadi henidia negana sibona lasi, to nega ma haida dekenai danu, namona be ita ese ‘dala idauidau ai ita hedinaraia ita be Dirava ena hesiai taudia,’ iseda dabua bona tauanina ena toana karaia dalana namona amo danu.—2 Kor. 6:3, 4.
Iseda dabua bona tauanina ena toana karaia namonamo be mai anina bada ia herevalaia neganai, Hesiai Gaukara Karaia Totona Ita Hegaegae bukana ia hahedinaraia iseda tauanina ia goeva bona iseda dabua bona tauanina ena toana idia namo be gau badana haroro gaukara ita karaia neganai, bona Keristani heboudia dekenai ita lao neganai. Rau 131, paragraf 1 lalonai ia gwau: “Ita gwauraia gaudia iboudiai be mai edia anina Brooklyn ena Betele rumana eiava Society ena brens opesi ta ita vadivadi henia neganai. Mani umui laloa, hari hereva Betele ena anina be ‘Dirava ena Ruma,’ unai dainai namona be iseda dabua, iseda toana bona iseda kara unai gabu lalodiai be iseda Kingdom Hall dekenai ita karaia gaudia bamona.” Namona be unai bamona toana namo hereana be Basileia harorolaia taudia, iseda gabu dekenai bona gabu daudau dekenai amo idia mai taudia, Betele famili idia itaia bona bamoa totona brens rumadia idia vadivadi henia taudia, ese idia hahedinaraia.
Namona be iseda dabua karaia dalana ese lalohadai namona ia hahedinaraia ma haida dekenai, idia ese dala maorona ai Iehova tomadiho henia karana momokanina idia laloa totona. To ai itaia, tadikaka bona taihu haida be Society ena ruma idia vadivadi henidia neganai, edia toana bona dabua idia laloa lasi bona idia atoa kava sibona. Betele rumadia ita vadivadi henidia neganai, unai bamona dabua karaia dalana be namo lasi. Ita ura unai kahana dekenai, iseda Keristani mauri ena kahana idauidau lalonai hegeregerena, toana namo hereana ita hahedinaraia, unai amo ia hedinarai Dirava ena taunimanima be tanobada amo idia idau badina gau ibounai idia karaia Dirava hanamoa totona. (Roma 12:2; 1 Kor. 10:31) Danu, namona be unai gaudia ita kikilaia iseda Baibel stadi taudia bona nega ginigunana Betele idia ura vadivadi henia taudia ma haida dekenai, bona idia ita hadibaia lou dabua namona bona tauanina ena toana namona be mai anina bada.
Unai dainai Society ena ruma idauidau ita vadivadi henidia neganai, namona be sibona ita henanadai: ‘Egu dabua bona tauanina ena toana be mai hemataurai danu lau karaia eiava?’ (Mika 6:8 itaia.) ‘Lau karaia dabua dainai lau tomadiho henia Diravana do idia hanamoa eiava? Egu toana ese haida edia hemami ia hadikaia eiava idia ia habadua, a? Nega ginigunana ai Betele idia vadivadi taudia dekenai haheitalai namona lau hahedinaraia, a?’ Namona be nega ibounai, iseda dabua bona tauanina ena toana namona amo ia hedinarai, iseda kara namodia ibounai ese Hahemauri Diravana ena hahediba herevadia idia hahairaia.—Tito 2:10.