Namo Herea Ita be Iniseni Ita Noho Hanaihanai!
1 Lagani momo lalodiai Europe ena Ist kahana ai, iseda tadikaka momo edia hebou karana idia taravatua. Gavamani ese unai taravatu idia kokia, bena mai ura-kwalimu ida idia hebou diba neganai, edia moale oi laloa!
2 Sekit naria tauna be unai bamona kongregesen ta dekenai ia lao bona ena vadivadi negana ia herevalaia, ia gwau: “Tuesday hanuaboi ai, egu vadivadi ena matamaia kahana ai, ruma ena hasiahua gaudia idia dika. Murimuri ai keru ena maka be aisi ena keru bamona, bona lalonai, ia be 5° C bamona sibona. Tadikaka idia helai bona edia kouti, aiona gaudia, imana gaudia, kwara gaudia bona tamaka idia hahedokilaia. Tau ta lasi be Baibel ia kehoa diba, badina ia hegeregere lasi ena rau ia kehoa totona. Egu dabua namodia lalonai platfom dekenai lau gini, lau keru masemase, bona lau hereva neganai, egu hereva ena hodahoda lau itaia diba. To lau laloa bada gauna be maumau herevana ta lasi lau kamonai. Tadikaka iboudiai idia gwau idia moale bada bona ia be gau namo herea unai hebou dekenai idia noho!” Unai tadikaka be hebou reaia lalohadaina idia abia lasi!
3 Iseda Mamina be Unai Bamona, A? Iseda hebou pura ta ta ibounai lalonai, idia taravatua lasi heboudia unai, ita laloa bada, a? Eiava ita hebou diba neganai, hebou ita lalodia bada lasi, a? Reana hanaihanai hebou dekenai ita lao be ia auka, bona reana nega haida badina namona dainai hebou dekenai ita lao diba lasi. To laloaboio lasi, ita huanai haida idia noho bona ena be idia buruka, idia gorere, edia tauanina ena kahana ta ia dika, edia gaukara ena sediual ia auka, bona maduna badadia ma haida idia huaia, to idia diba hebou be mai anina bada, bona kahirakahira nega ibounai hebou dekenai idia noho. Edia haheitalai namona ita tohotohoa be namo!—Luka 2:37 itaia.
4 Namona be hanaihanai tomadiho momokani ita abia isi iseda hebou iboudiai lao henia karana amo, buka stadi maragidia bona hebouhebou badadia danu. Dahaka dainai unai hebou lao henidia karana ita laloa bada be namo? Badina ita hebou be Dirava ena hahegani ta. To badina namodia ma haida idia noho. Ita ibounai be hebou ai, Dirava ese ia henia hadibaia herevadia edia namo bona lauma helaga ena heduru ita abia be gau badana. (Mat. 18:20) Iseda tadikaka ita bamodia neganai, hagoadaia heheni karana amo goada ita abia.—Heb. 10:24, 25.
5 Iesu ena toana ia idau neganai, Petero ia gwau: “Aiemai biaguna e, namo herea ita be iniseni ita noho.” (Luka 9:33) Namona be iseda Keristani hebou iboudiai be unai hegeregerena ita laloa. Momokani, namo herea ita be iniseni ita noho hanaihanai!