Ibounai ese “Hereva Idia Abia Dae” be Gau Badana!
1 Taunimanima milioni momo be Iehova ena Witness taudia ida Baibel idia stadilaia. Mauri hanaihanai idia abia totona, gau badana be “hereva idia abia dae,” Pentekoste dinana lagani 33 C.E. ai, idia helalo-kerehai bona idia bapatiso taudia 3,000 idia karaia hegeregerena. (Kara 2:41) Unai dainai, hari iseda maduna be dahaka?
2 Namona be iseda Baibel stiuden taudia ita durua Iehova idia badinaia totona. (1 Tim. 4:7-10) June 1996 Iseda Basileia Gaukara pepana lalonai idia udaia gauna, paragraf 20, ia gwau: “Stadi umui karaia neganai, Iehova ena kara laloa bada karana ia habadaia daladia oi tahua. Emu kudouna ena hemami Dirava dekenai be oi gwauraia hedinarai. Namona be stiuden oi durua Iehova tura henia karana ia habadaia totona.”
3 Ita Vairanai Ia Noho Gaukara Badana: Tomadiho koikoi ese taunimanima momo edia lalona ia veria dainai, edia nega bona goada ia haorea lasi bona edia mauri dalana ia haidaua momokani lasi tomadiho dalana ta idia badinaia. (2 Tim. 3:5) Ita vairanai ia noho gaukara badana be iseda Baibel stiuden taudia ita durua bona do idia diba tomadiho momokani ena anina be Dirava ena hereva idia kamonai sibona lasi. Edia mauri lalonai, idia dibaia gaudia idia badinaia be namo. (Iam. 1:22-25) Bema Dirava ese edia kara ta ia abia dae lasi, namona be idia diba edia maduna be edia ‘lalona idia giroa’ bona kara maorodia do idia karaia Dirava idia hamoalea totona. (Kara 3:19) Mauri hanaihanai idia abia totona, namona be ‘do idia raka goada’ bona hereva momokani dekenai idia gini goada.—Luka 13:24, 25.
4 Kara maoromaoro idauidau umui herevalaia neganai, emu Baibel stiuden oi nanadaia ena lalohadai unai kara dekenai be dahaka, bona dahaka do ia karaia bema ia davaria iena mauri dekenai kara haida ia haidaua be namo. Hereva momokani ia hadibaia oreana ia laloa totona iena lalona oi veria, bona ia oi hagoadaia hanaihanai kongregesen heboudia dekenai ia lao.—Heb. 10:25.
5 Namona be ita ura stiuden ena lalona ita veria iseda hadibaia dalana amo. Matamata taudia ita hagoadaia bena, mai edia ura ida Dirava ena hereva idia abia dae bona bapatiso idia abia neganai, do ita moale!—1 Tes. 2:13.