Lagani 1999 Ena Hebouhebou Program Matamatadia
1 February dekenai do idia matamaia dina rua sekit hebouhebou edia sinado be “Dirava Ena Oda Oi Badinaia Bona Do Oi Mauri.” (Aon. 4:4) Do ia hahedinaraia dahaka dainai Dirava ena oda ita badinaia be metau gauna lasi. Danu, do ia hahedinaraia edena dala ai Dirava ena ura badinaia karana ese goada, moale korikori, bona helaro vaira negana totona ia henia.—Mat. 11:28-30; Ioa. 13:17.
2 Kahana ta ese Dirava bona iseda tadikaka lalokau henia daladia do ia hahedinaraia. (Ioa. 13:34, 35; 1 Ioa. 5:3) Program lalonai idia ese kudouna hamarerea sisiba be Salamo 19 bona 119 amo do idia henia.
3 Distrik naria tauna ese do ia henia pablik tok ena sinado be “Dirava Oi Gari Henia Bona Ena Oda Oi Badinaia.” (Had. 12:13) Sekit naria tauna ena hereva ginigabena ese hari inai negai matamata taudia ese edia mauri idia moalelaia diba dalana, bona hanaihanai vaira negana totona idia lalo-goada ena badina, do ia hahedinaraia. Distrik naria tauna ese program ena hereva ginigabena do ia henia neganai, ia ese lalokau ena “taravatu badana” badinaia karana amo ita abia hahenamo momo do ia herevalaia.—Iam. 2:8.
4 Dina tamona hebouhebou ena program matamatana ena sinado be “Iehova Ena Aniani Patana Laloa Bada.” (Isa. 65:14; 1 Kor. 10:21) Ita do ia hagoadaia, iseda mauri lalonai Iehova tomadiho henia karana ita atoa guna totona. (Sal. 27:4) Sekit naria tauna ena hereva be “Iseda Kudouna Ena Ura Ita Tahua Noho,” bona ia ese iseda lalohadai hebou lao henia karana dekenai ia herevalaia. Vadivadi tauna ese do ia hahedinaraia edena bamona “Iehova Ena Aniani Patana ai Ita Aniani Karana amo Lauma Dalanai Ita Goada Noho.” Program ena kahana haida ese Iehova ena orea lalonai idia noho matamata taudia do idia durua, Dirava ena hesiai gaukara lalonai idia gini goada totona. Vadivadi tauna ena hereva badana ena sinado “Lauma Dalanai Ita Goada Noho Ita Haroro Goadagoada Totona,” ese do ia hahedinaraia edena dala ai kongregesen amo ita abia heduru dainai, Basileia ita harorolaia goadagoada diba. Ita ibounai ita ura unai program amo namo do ita davaria, ani?
5 Keriso ena oda idia badinaia dainai, unai hebouhebou ta dekenai idia ura idia bapatiso taudia, be kongregesen gunalaia tauna idia hadibaia be namo, ia ese unai do ia hegaegaelaia totona.—Mat. 28:19, 20.
6 Oibe, ita ura lasi unai hebouhebou ruaosi amo lauma dalanai idia henia harihari gaudia namodia ita reaia!
This article unique to PNG.