Betele Gaukara—Aplikeisen Henia Totona Oi Laloa, A?
1 Salamo 110:3 ese ia hahedinaraia inai dokona negana lalonai, Dirava ena taunimanima ese idia hahedinaraia kara badana be mai edia ura bada ida Basileia ena gaukara idia karaia goadagoada. Tanobada hegegemadai Iehova ena taunimanima idia hekwarahi Basileia ena sivarai namona idia harorolaia totona. Proclaimers bukana, rau 295, ia gwau: “Haida be tanobada ibounai dekenai idia noho Betele dekenai idia gaukara. Idia be ful-taim hesiai taudia bona sibona idia henia, Baibel buka bona magasin hegaegaelaia bona halasia gaukara, opesi gaukara, bona unai bamona gaukara dekenai heduru idia henia herevana edena gaukara idia henidia to idia karaia sibona. Unai gaukara amo ladana bada bona kohu momo idia abia lasi. Edia ura be Iehova idia hanamoa, bona idia abia aniani, noho gabuna, bona sibona edia gaudia hoia totona idia abia moni maragina dainai idia moale.” Hesiai Gaukara Karaia Totona Ita Hegaegae bukana, rau 116, ia gwau: “Unai ladana Betele ena anina be ‘Dirava ena Ruma,’ bona unai be ladana namona badina unuseniai Dirava ena gaukara idia karaia momo.” Betele dekenai volantia gaukara idia karaia taudia be edena gaukara idauidau idia karaia?
2 Gaukara Idauidau: Iseda Betele famili taudia dekenai idia henia gaukara be idauidau. Tadikaka bona taihu haida be Gado Hahanaia Dipatmen dekenai idia gaukara, buka, magasin, buklet, bona pepapepa maragidia be Hiri Motu gado bona New Guinea Pidgin gado dekenai idia hahanaia. Ma haida edia gaukara be unai bukadia be kongregesen idauidau dekenai idia siaia, bona haida be kongregesen idauidau dekenai mai anina bada revarevadia idia torea. Haida edia gaukara be gaukara kohu bona ruma idia naria. Betele Rumana lalonai unai ruma bese naria totona gaukara badana idia karaia. Hegeregere, Betele famili taudia edia aniani be dina ibounai nega toi idia nadua bona idia henia. Dabua huria dipatmen dekenai, pura ibounai dabua 100 momo idia hagoevaia bona idia aeania. Danu, tadikaka bona taihu haida ese unai ruma bese taudia idia noho rumadia idia hagoevaia namonamo.
3 Betele Dekenai Idia Vareai Diba Taudia Edia Taravatu: Unai gaukara momo be auka bona mai ena hekwarahi, unai dainai ai ura idia do headava lasi tatau matamatadia mai edia goada be do idia vareai, to headava lasi taihu taudia ai laloa danu. Tau matamata ta be gwauhamata ia karaia bona bapatiso ia abia negana amo lagani tamona ia lao murinai, Betele gaukara totona aplikeisen ia henia diba. Dirava ia badinaia bona lauma dalanai ia goada be gau badana. Danu, namona be ia ura ia gaukara goada. Hari inai tanobada dekenai, taunimanima momo ese gaukara goada karana idia dadaraia vaitani. Unai dainai namona be Betele gaukara totona aplikeisen ia henia tadikaka matamatana ese kara matamatadia ia manadalaia vadaeni, bona ia hegeregere ia gaukara goada totona, iena imana dekena amo gaukara namona do ia karaia. (Efeso 4:28 itaia.) Namona be Betele gaukara ena aplikeisen henia totona ia laloa neganai, memero edia kara ia rakatania vadaeni.—1 Korinto 13:11 itaia.
4 Oiemu mauri lagani be 19 bona 35 huanai, a? Tauanina bona hemami dalanai oi goada, a? English gado, Hiri Motu gado, eiava New Guinea Pidgin gado oi duahia, torea, bona hereva namonamo diba, a? (Betele dekenai hadibaia hereva momo be English gado dekenai idia torea, unai dainai English gado dibaia totona oi hekwarahi be namo, ena be Betele dekenai do oi vareai totona English gado oi diba namonamo be kara ginigunana ta lasi.) Lauma dalanai oi goada bona Iehova oi lalokau henia bada bona ena orea oi ura henia bada, a? Bema Betele dekenai oi do idia boiria, do oi gwauhamata lagani tamona unai hesiai gaukara do oi karaia, bona herevana edena gaukara idia henia to do oi karaia, a? Bema unai henanadai dekenai oiemu haere be oibe, namona be Betele gaukara oi lalohadailaia.
5 Betele Gaukara Ena Hahenamo Idauidau: June 15, 1994, Gima Kohorona ena hereva ta ladana “ ‘Dirava Ena Ruma’ Ita Raraia mai Lalo-Moale Ida,” ia gwau: “Hebouhebou ta ai oi lao bona Iehova idia tomadiho henia moale taudia bogaragidiai oi noho neganai, moale momokani mamina oi abia, a? Inai oi laloa, dina ta ta iboudiai Betele gaukara tauna ena moale ahuna be tadikaka bogaragidiai Iehova ia hesiai henia diba! (Sal. 26:12) Lauma dalana ai oi tubu noho dala namona be unai! Tadikaka ta ia gwau, Betele dekenai lagani tamona lalonai ia diba gaudia ese ia durua namo herea iena kara bona lalohadai ia hamaoromaoroa totona, to lagani toi ma gabu ta dekenai be unai bamona ia durua lasi. Badina be dahaka? Badina ma gabu ta dekenai lo Keristen taudia momo idia noho lasi edia abidadama ia itaia bona ia tohotohoa totona.” (Aon. 13:20) Momokani, unai be Betele gaukara ena hahenamo badana ta. Herevana ta ena gaukara be dahaka, to Dirava idia badinaia kamonai taudia danu mai lalo-tamona ida ia gaukara diba be hahenamo ta.
6 Dina ta ta Gaudia: Betele famili tauna ta ese dina ta ta ia karaia gaudia dainai Basileia gaukara lalonai ia vareai momokani. Dabai 7:00 a.m., Monday ia lao Saturday, daba ena tomadiho karana be aniani daiutuna dekenai ia matamaia. Famili taudia ese dina ena siri dekenai hereva haida idia gwauraia bena lagani momo lalonai ful-taim hesiai gaukara ia karaia tadikaka ta ese unai ia herevalaia danu, unai murinai be daba ena guriguri. Unai program ese lauma dalanai famili taudia ibounai ia hagoadaia dina ena gaukara idia karaia totona. Betele famili taudia ta ta ese oi idia hadibaia diba dina ta ta gaudia amo unai idia laloa bada. Daba ena aniani murinai, Betele famili taudia be edia gaukara dekenai idia lao mai edia ura ida. Monday ia lao Friday dekenai gaukara dinana be dabai 8:00 a.m. ia lao adorahi 5:00 p.m., bona hora tamona be dina tubu ena aniani totona. Saturday dabai idia gaukara danu, dabai 8:00 a.m. ia lao dina tubu 12:00 p.m. Hanuaboi, Saturday adorahi, bona Sunday lalodiai, Betele taudia be edia kongregesen heboudia dekenai idia lao, ruma-ta-ruma-ta gaukara eiava Baibel stadi idia karaia, eiava sibona edia gaukara idauidau idia karaia. Idia ese Betele ena laiberi idia gaukaralaia diba, sibona edia stadi idia karaia bona hebou gaudia idia hegaegaelaia totona. To momokani, nega ia noho idia laga-ani totona danu.—Mar. 6:31, 34.
7 Kongregesen Gaukara: Betele famili taudia be Port Moresby ena kongregesen idauidau dekenai idia siaia. Lauma dalanai idia goada noho totona kongregesen ena anina idia laloa bada. Unai dainai, edia kongregesen dekenai idia gaukara goadagoada, hebou ima iboudiai dekenai idia lao bona edia tadikaka ida haroro gaukara idia karaia hanaihanai. Kongregesen heboudia dekenai idia lao sibona lasi, to Betele famili taudia be mai edia Gima Kohorona Stadi Monday hanuaboi ai bona idia ibounai be unai hebou dekenai idia lao danu. Betele ena sediual lalonai lauma gaudia be mai anina bada dainai, Iehova idia hesiai henia mai edia moale bada ida.—1 Kor. 15:58.
8 Betele Gaukara Totona Oi Hegaegae: Betele gaukara totona be edena bamona oi hegaegae diba? Hakaua Oreana tauna ta ia gwau: “Betele dekenai oi mai neganai, namona be oi idia hesiai henia totona oi mai lasi, to ma haida oi hesiai henia totona oi mai. Hesiai henia karana oi dibaia namonamo neganai, oiemu moale be do ia bada. Abia karana lasi to henia karana oi dibaia. Oi manau, oi hekokoroku lasi. Lauma helaga ena huahua—unai be Keristani maurina korikorina ena badina.” Oibe, lauma dalanai oiemu goada oi habadaia bona oiemu hetura karana Iehova ida oi hagoadaia neganai Betele dekenai do oi kwalimu diba. Unai dainai Betele dekenai volantia matamatadia idia abia hidi neganai, nega momo painia taudia idia abia hidi. Bema ta ese nega sisina daudau lalonai sibona ena kara ia biagua, hua ibounai lalonai hora 70 be haroro, hadibaia, bona henia karana lalonai ia gaukaralaia totona, bona sibona ena mauri durua gaudia abia, ia ese lauma dalanai badina namona ia haginia Betele gaukara bona ena mauri dalana namona do ia manadalaia totona. To, namona be oi diba, Betele gaukara be painia taudia sibona totona lasi. Betele dekenai idia vareai taudia edia taravatu dekenai idia hegeregere taudia ibounai be aplikeisen idia henia diba.
9 Danu, tau matamatadia ese imana gaukaradia idia dibaia be namo. Tulu bona masini idauidau idia gaukaralaia diba be namo herea. (Aon. 22:29) Nega momo, tau matamatadia ese sikuli dekenai, edia tama sina amo, eiava Kingdom Hall dekenai idia karaia gaukara idauidau dekenai diba bada tau badadia durua karana amo, imana gaukara idauidau idia dibaia diba.
10 To ta ese gaukara ta ia diba dainai sibona, Betele gaukara totona ia hegeregere lasi. Lauma gaudia be mai anina bada bona lauma dalanai idia goada taudia sibona do ai boiria. Ai ese tama sina bona edia sikuli natudia ai hagoadaia, November 1, 1992, Gima Kohorona, rau 15 ia lao 21 dekenai ia noho herevana, sikuli edukeisen laloa maoromaoro herevana, do idia lalohadailaia. Herevana ta ena sikuli edukeisen be edena bamona, to laloa dalana ia diba be gau badana. Baibel ese laloa dalana maorona bona aonega maorona ia gwauraia namo. (Aon. 1:4; 3:21) Laloa dalana bona oi abia dibana oi dogoatao dalana oi dibaia ese oi ia durua, oi bona Iehova ena tanobada oreana do ia durua dibana ma haida oi abia totona. Dokonai, herevana ta ena diba ena bada be edena bamona, to gau badana be ma haida ida ia noho namonamo diba. Gau badana be Betele ena volantia taudia be idia gaukara hebou, edia gaukara idia hagugurua diba totona. Unai dainai, sibona ena lalohadai badinaia karana bona kara helulu lalohadaina oi rakatania be namo bona edia gabu ai gaukara hebou urana, lalokau karana, bona tiokratik hakaua dalana badinaia urana oi hagoadaia be namo.—Efeso 4:16 itaia.
11 Iehova ena orea lalonai idia noho matamata taudia be mai edia dala namona, ataiai ai gwauraia karadia idia habadaia totona. Bena, bema Betele dekenai idia boiridia, idia hegeregere Iehova ena orea lalonai diba idia abia noho, maduna ma haida do idia huaia totona. Tama sina momo be edia natudia idia mailaia Betele idia itaia totona, unai amo idia diba iniseniai dahaka ai karaia.
12 Oi Ai Boiria Aplikeisen Oi Henia Totona: Betele aplikeisen matamatadia momo be idia noho neganai, ta ai ura boiria neganai tadikaka o taihu maorona ai abia hidi be auka lasi. Hari, ai ura Papua New Guinea taudia, idia do headava lasi gwauhamata tadikaka bona taihu, ese Betele aplikeisen do idia henia. Sikuli dekenai greid 10, eiava ma greid haida, idia karaia taudia, motuka taria laiseni idia abia taudia, eiava gaukara ta idia diba namonamo taudia, ai hagoadaia aplikeisen idia henia totona. Idia bapatiso headava tau bona hahine amo aplikeisen ai abia dae danu. Betele aplikeisen pepana be distrik hebouhebou dekenai Betele gaukara idia ura henia taudia totona idia karaia hebou dekenai oi abia diba. Emu sekit naria tauna danu be reana oi do ia durua diba. Bema oi headava vadaeni, gau badana be oiemu adavana danu be lauma, hemami, bona tauanina dalanai Betele dekenai idia boiria taudia edia taravatu dekenai ia hegeregere. Bema gaukara idauna ta oi diba, mani unai gauna be revareva ta dekenai oi hahedinaraia namonamo bona emu Betele aplikeisen ida do oi siaia.
13 Nega haida, ena mauri lagani be 35 ia hanaia vadaeni tadikaka eiava taihu ai boiria diba, bema edia diba gaukara ta dekenai be hegeregere Betele dekenai ai gaukaralaia totona. Hari Society ese ia karaia gaukara momo lalonai, diba bada taudia ese idia goada bona diba idia abia diba Papua New Guinea tadikaka ida idia gaukara hebou, “diba tahua taudia bona hadibaia taudia, be maka tamona dekenai” idia gaukara.—1 Siv. 25:8.
14 Bema Betele dekenai idia boiria taudia edia taravatu dekenai oi hegeregere, oi ai hagoadaia Betele aplikeisen oi henia totona. Bema maoromaoro oi ai boiria lasi, mani oi lalohisihisi lasi. Lagani ta ta aplikeisen oi henia lou diba. Unai ese ai dekenai ia hahedinaraia oi mai diba eiava lasi. Unai oi naria noho lalonai, namona be regula painia gaukara oi laloa bema oi do karaia lasi.
15 Peroveta tauna Isaia be ia kamonai neganai, Iehova ia henanadai: “Daika do lau siaia? Daika be ai totona do ia lao?” Isaia ia daradara lasi to maoromaoro ia haere: “Lau be inai, do lau lao! Lau do oi siaia!” Unai dala ai, Isaia ese Dirava ena peroveta tauna ena gaukara namona ia hamatamaia. Oi gwau diba, “Lau be inai, do lau lao! Lau do oi siaia”? Hahenamo momo do oi abia bema “Dirava ena Ruma,” Betele, dekenai hesiai gaukara karaia totona oi do idia boiria.—Isa. 6:8.
This article has been taken partly from km-E 3/95 “Bethel Service—More Volunteers Needed.”