Oi Haroro Bona Dekena Taudia Dekenai Kara Namodia Oi Hahedinaraia
1 Iesu ia gwau “oiemu badibadinai tauna dekenai oi lalokau henia, oi sibona oi lalokau henia bamona.” (Mat. 22:39) Oibe, emu abidadama tamona taudia dekenai “kara namodia” oi karaia, to oi badibadinai idia noho taudia dekenai emu lalokau do oi hahedinaraia diba danu, a? (Gal. 6:10) Edena dala idauidau ai?
2 Oi Sibona Oi Gwauraia Hedinarai: Oiemu dekena taudia idia diba oi be Witnes tauna ta, a? Bema lasi, haroro gaukara neganai oi vadivadi henidia be namo, ani? Reana unai amo ia vara gauna do oi hoalaia! Eiava bema oi ura, nega bona gabu idauidau ai oi haroro henidia toho. Murimuriai, reana oi itaia edia ruma badina dekenai idia gaukara eiava dala dekenai idia raka loaloa. Mai emu moale toana ida oi hereva henidia. Emu abidadama, Kingdom Hall ia gini gabuna, bona unuseniai idia vara gaudia oi herevalaia toho, bona emui gabu amo hebou dekenai idia lao taudia ma haida oi gwauraia. Idia oi boiria hebou dekenai idia mai totona. Namona be oi diba taudia ibounai dekenai sivarai namona oi harorolaia.—Kara 10:42; 28:23.
3 Emu Kara Namodia Amo: Emu kara namodia ese oiemu kara korikorina idia dekenai do ia hahedinaraia bona reana dala do ia kehoa oi haroro henidia totona. Dirava ena ‘sivarai namona dekenai hairai bona mataurai ia havaraia’ danu. (Tito 2:7, 10) Emu dekena taudia laloa bada karana oi hahedinaraia. Oi tura henidia bona edia hemami oi laloa bada. Dekena taudia be idia ura sibodia idia noho bona regerege idia ura lasi karadia oi matauraia be namo. Bema idia ta ia gorere, namona be ia oi laloa karana oi hahedinaraia bona heduru oi henia. Famili matamatana ta be emu gabu dekenai idia noho matamaia neganai, oi lao bona oi welkam henidia. Unai bamona kara namodia dainai edia hemami be namo bona unai kara ese Iehova ia hamoalea.—Heb. 13:16.
4 Emu Noho Gabuna Ena Toana Amo: Dekena tauna namona ena kara oi hahedinaraia neganai, emu ruma oi naria namonamo ena toana be namo totona. Ruma bona noho gabuna idia goeva bona mai edia hairai be kara namo hahedinaraia karana. To ruma ia miro bona ia badinai oi gaukaralaia lasi kohu oi negea kava dainai, reana taunimanima ese Basileia ena sivarai idia ura henia lasi. Unai dainai, gau badana be emu ruma, ruma ia noho gabuna, bona motuka oi hagoevaia bona oi hanamoa be namo.
5 Keristani kongregesen lalonai idia noho lasi taudia laloa momo karana ese emu lalokau karana dekena taudia dekenai ia hahedinaraia. Bena reana dahaka be do ia vara? Reana ‘emu kara namodia idia itaia neganai,’ idia haida ese “Dirava do idia hanamoa.”—1 Pet. 2:12.